ઉપરવાસમાં ભારે વરસાદના કારણે સરદાર સરોવર ડેમમાં પાણીની આવક વધી

સરદાર સરોવર ડેમના ઉપરવાસ મધ્યપ્રદેશમાં ભારે વરસાદના કારણે પાણીની આવક વધી છે. સરદાર સરોવર ડેમમાં દર કલાકે 1,17,257 ક્યુસેક પાણીની આવક થઈ રહી છે. જેના કારણે ડેમની જળ સપાટી 135.03 મીટરે પહોંચતા રૂલ લેવલ જાળવવા શુક્રવારે સાંજથી ડેમના 9 દરવાજા ખોલીને નદીમાં 50 હજાર ક્યુસેક અને કેનાલમાં 66,976 મળીને કુલ 1,16,976 ક્યુસેક પાણી છોડવામાં આવી રહ્યુ છે.

સરદાર સરોવર ડેમના ઉપરવાસમાં મુશળધાર વરસાદ વરસી રહ્યો છે. સારા વરસાદના પરિણામે નર્મદા ડેમમાં પાણીની આવક વધી છે. સરદાર સરોવર ડેમમાં દર કલાકે 1,17,257 ક્યુસેક પાણીની આવક થઈ રહી છે. પાણીની આવકના કારણે ડેમની જળ સપાટી 135.03 મીટરે પહોંચી છે.

ડેમનું રૂલ લેવલ જાળવવા તંત્રએ શુક્રવારે સાંજે 6 વાગ્યાથી 5 દરવાજાના બદલે 9 દરવાજા ખોલીને નર્મદા નદીમાં 50 હજાર અને કેનાલમાં 66,976 મળી કુલ 1,16,976 ક્યુસેક પાણી છોડવામાં આવી રહ્યુ છે. નર્મદા નદી બે કાંઠે વહી રહી હોવાથી નર્મદા, ભરૂચ અને વડોદરા જિલ્લાના નદી કાંઠા વિસ્તારના ગામ અને શહેરના લોકોને સાવચેત કરાયા છે.

ગરૂડેશ્વર વિયર ડેમ ઓવરફ્લો થયો :

10 ઓગસ્ટથી સરદાર સરોવર ડેમમાં પાણીની આવક વધતા રિવરબેડ પાવરહાઉસ શરૂ કર્યુ છે. જ્યારે 11 ઓગસ્ટથી ડેમના દરવાજા ખોલી નદીમાં પાણી છોડવામાં આવી રહ્યું છે. જેના કારણે ગરૂડેશ્વર વિયર ડેમ ઓવરફ્લો થયો છે. સરદાર સરોવર ડેમના 9 દરવાજા ખોલીને રિવરબેડ પાવરહાઉસના તમામ 6 યુનિટ ચલાવી 1200 મેગાવોટ વીજળી ઉત્પન્ન કરવામાં આવી રહ્યુ છે. હાલમાં અંદાજે 93,543 ક્યુસેક પાણી નદીમાં છોડવામાં આવી રહ્યું છે. સ્ટેચ્યું ઓફ યુનિટી એકતા નગર ખાતે આવતા પ્રવાસીઓ માટે ગરૂડેશ્વર વિયર ડેમ અનોખું આકર્ષણ બની રહ્યો છે.

ધરોઈ ડેમમાં દર કલાકે 6111 ક્યુસેક પાણીની આવક :

ઉત્તર ગુજરાતની જીવાદોરી સમાન ધરોઈ ડેમના ઉપરવાસ રાજસ્થાનમાં પણ સારો વરસાદ વરસ્યો છે. તેથી શનિવાર સવારથી ડેમમાં પાણીની આવક વધી છે. શનિવારે સવારે 8 કલાકે ડેમમાં દર કલાકે 6111 ક્યુસેક પાણીની આવક થઈ રહી છે. ડેમની ભયજનક સપાટી 622 ફૂટની સામે હાલમાં 603.27 ફૂટ જળ સપાટી પહોંચી છે. એટલે કે 41.53 ટકા ડેમ ભરાયો છે. કુલ 28716 એમસીએફટી ક્ષમતા સામે હાલમાં 11927 એમસીએફટી પાણી સંગ્રહ થયુ છે.