મધ્યપ્રદેશમાં જર્જરિત પુલ ધરાશાયી,10 દટાયા

મધ્યપ્રદેશના રાયસેલ જિલ્લામાં સોમવારે સવારે સરકારી બેદરકારી અને ભ્રષ્ટાચારનો વધુ એક ગંભીર દાખલો સામે આવ્યો છે. બરેલી તાલુકામાં આવેલા બરેલી-પિપરિયા સ્ટેટ હાઇવે પર નયાગાંવ નજીકનો પુલ અચાનક ધરાશાયી થતાં મોટો અકસ્માત સર્જાયો હતો. પુલ તૂટી પડતાં તેના કાટમાળ નીચે કુલ 10 લોકો દટાયા હોવાનું જાણવા મળ્યું છે.

પ્રાપ્ત માહિતી મુજબ, આ પુલ લગભગ 50 વર્ષ જૂનો હતો અને લાંબા સમયથી ખસ્તા હાલતમાં હતો. છતાં તેને પુનઃનિર્માણ કરવાની જગ્યાએ ઉપર માત્ર નવો રોડ પાથરીને વાહનવ્યવહાર ચાલુ રાખવામાં આવ્યો હતો. આશ્ચર્યની વાત એ છે કે, જોખમી સ્થિતિ હોવા છતાં પુલની નીચે સમારકામ માટે શ્રમિકો કામ કરી રહ્યા હતા અને ઉપરથી વાહનો અવરજવર કરતા રહ્યા.

સોમવારે સવારે પુલનો એક ભાગ તૂટી પડતાં ઉપર બાઈક પર જઈ રહેલા લોકો નીચે ખાબક્યા અને નીચે કામ કરતા મજૂરો કાટમાળમાં ફસાયા હતા. આ ઘટનાની જાણ થતાં જ પ્રશાસન અને પોલીસનો કાફલો સ્થળે દોડી આવ્યો હતો. ઘાયલોને તાત્કાલિક હોસ્પિટલ ખસેડવામાં આવ્યા છે, જેમાં એકની સ્થિતિ ગંભીર હોવાથી તેને ભોપાલ રિફર કરાયો છે.

પ્રશાસન દ્વારા પ્રાથમિક તપાસના આદેશ આપવામાં આવ્યા છે, પરંતુ સ્થાનિક લોકોમાં સરકારી એજન્સીઓની કાર્યપ્રણાલી સામે ભારે રોષ જોવા મળી રહ્યો છે. લોકોનો સવાલ છે કે, જો સમયસર પુલનું નિર્માણ કરવામાં આવ્યું હોત તો આ દુર્ઘટના ટાળી શક્યા હોત