દિલ્હીમાં AQI 400ને પાર, GRAP-III લાગુ

કેન્દ્ર સરકાર દ્વારા મંગળવારે દિલ્હી-NCRમાં પ્રદૂષણની ગંભીર સ્થિતિને ધ્યાનમાં રાખીને તાત્કાલિક અસરથી GRAP ના તબક્કા-IIIના કડક નિયમો લાગુ કરવામાં આવ્યા છે. વાયુ ગુણવત્તા વ્યવસ્થાપન આયોગની પેટા-સમિતિએ નિર્ણય લીધો છે કે, દિલ્હીનો ઓવરઓલ એર ક્વોલિટી ઇન્ડેક્સ આ સિઝનમાં પહેલીવાર 'ગંભીર' કેટેગરીમાં પહોંચી ગયો છે, જે સોમવારના 362થી વધીને મંગળવારે સવારે 9 વાગ્યા સુધીમાં 425 થઈ ગયો હતો. 

NCRમાં લાગુ કરાયેલા તબક્કા-I અને IIની કાર્યવાહી

CAQM એ કહ્યું કે, આ તબક્કો NCRમાં પહેલાથી લાગુ કરાયેલા તબક્કા-I અને II ની કાર્યવાહી ઉપરાંત છે. સેન્ટ્રલ પોલ્યુશન કંટ્રોલ બોર્ડ (CPCB)ના સમીર એપના ડેટા મુજબ, મંગળવારે સવારે 7 વાગ્યે, શહેરના 39 સક્રિય સ્ટેશનોમાંથી 34માં AQI સ્તર 'ખૂબ જ ખરાબ' હતું, જેમાં બવાના, વઝીરપુર, મુંડકા અને પંજાબી બાગ (બંને 452) જેવી જગ્યાઓ રેન્જના ઉપલા સ્તરે હતી.

GRAP-III હેઠળ પ્રદૂષણ પર કાબૂ મેળવવા માટે કડક પાબંદીઓ લગાવાઈ

1.  બાંધકામ પ્રતિબંધ: તમામ બિન-જરૂરી બાંધકામ અને તોડી પાડવાની પ્રવૃત્તિઓ પર સંપૂર્ણપણે પ્રતિબંધ મૂકવામાં આવ્યો છે. આમાં માટીનું ખોદકામ, સીવર લાઈન અથવા વીજળીના કેબલ નાખવા જેવા કામોનો સમાવેશ થાય છે.

2.  વાહન પ્રતિબંધ: દિલ્હી, નોઈડા, ગાઝિયાબાદ, ફરીદાબાદ અને ગુરુગ્રામ સહિત સમગ્ર NCR માં BS-III પેટ્રોલ અને BS-IV ડીઝલ 4-પૈડા વાહનોના સંચાલન પર રોક લગાવી દેવામાં આવી છે. આ નિયંત્રણોનો હેતુ વાહનોમાંથી થતા પ્રદૂષણને ઘટાડવાનો છે. આ સખત પગલાંનો હેતુ પ્રદૂષણના વધતા જોખમને ઘટાડવા અને લોકોના સ્વાસ્થ્ય પરની ગંભીર અસરને નિયંત્રિત કરવાનો છે.