દિલ્હી: પ્રશાંત વિહારમાં સીઆરપીએફ સ્કૂલ પાસે બ્લાસ્ટ

 

રવિવારે દિલ્હીના પ્રશાંત વિહાર વિસ્તારમાં સીઆરપીએફ સ્કૂલ પાસે બ્લાસ્ટ થયો હતો. વિસ્ફોટના અવાજથી આસપાસના લોકોમાં ગભરાટ ફેલાયો હતો. 
નજીકની દુકાનોને નુકસાન થયું હતું. ઘટના સ્થળે હાજર લોકોએ જણાવ્યું હતું કે વિસ્ફોટનો અવાજ સાંભળીને તેઓ તરત જ તેમના ઘર અને દુકાનોની બહાર દોડી આવ્યા હતા. સ્થાનિકોમાં ચિંતા અને ભયનો માહોલ છે. વહીવટી અધિકારીઓએ તેમની તપાસ શરૂ કરી દીધી છે. આ બધાની વચ્ચે રાહતની વાત એ છે કે બ્લાસ્ટમાં કોઇ જાનહાનિના સમાચાર નથી.
આ કેસની ગંભીરતાને જોતા દિલ્હી પોલીસે બેરિકેડ લગાવીને વિસ્તારને સીલ કરી દીધો છે. આ ઉપરાંત ફોરેન્સિક સાયન્સ લેબોરેટરીની ટીમને ઘટના સ્થળે બોલાવવામાં આવી છે. એફએસએલની ટીમ બ્લાસ્ટના કારણોની તપાસ કરીને સ્પષ્ટ કરશે કે આ હુમલો છે કે અકસ્માત. દિલ્હી પોલીસના સ્પેશિયલ સેલની ટીમ પણ ઘટના સ્થળે પહોંચી ગઈ છે.
 ડીસીપી અમિત ગોયલે જણાવ્યું હતું કે વિસ્ફોટનું કારણ જાણવા માટે નિષ્ણાતોને બોલાવવામાં આવ્યા છે. અત્યારે એ સ્પષ્ટ નથી થઈ શક્યું કે તે કયા પ્રકારનો વિસ્ફોટ હતો. તેમણે વધુમાં જણાવ્યું હતું કે નિષ્ણાત ટીમ આ ઘટનાની વિસ્તૃત તપાસ કરી રહી છે અને ટૂંક સમયમાં પરિસ્થિતિ સ્પષ્ટ થઈ જશે.
ફાયર બ્રિગેડે જણાવ્યું હતું કે રોહિણીના પ્રશાંત વિહાર વિસ્તારમાં સીઆરપીએફ સ્કૂલની બહાર વિસ્ફોટની જાણ થઈ હતી. ફાયર વિભાગને સવારે લગભગ 7:50 વાગ્યે આ ઘટનાની માહિતી મળી હતી, ત્યારબાદ 2 ફાયર એન્જિનને તાત્કાલિક ઘટના સ્થળે મોકલવામાં આવ્યા હતા. જો કે હજુ સુધી દિવાલમાં આગ લાગવાની કે નુકસાનીના સમાચાર મળ્યા નથી.

-આઈએએનએસ