પાડોશી દેશોમાં સંકટ બાંગ્લાદેશ-પાકિસ્તાનમાં હાહાકર

ભારતના બે પડોશી દેશો હાલ અત્યંત ભયાનક અને અસ્થિર સ્થિતિનો સામનો કરી રહ્યા છે. એક તરફ બાંગ્લાદેશમાં આંતરિક વિખવાદ અને હિંસાની આગ ભભૂકી રહી છે, તો બીજી તરફ પાકિસ્તાન સરહદી વિસ્તારોમાં આતંકી હુમલાઓથી હચમચી ઉઠ્યું છે.

બાંગ્લાદેશમાં અરાજકતાનો માહોલ: બાંગ્લાદેશમાં ભારત વિરુદ્ધ સતત ઝેર ઓકનારા ઉસ્માન હાદીનું સિંગાપોરમાં નિધન થયા બાદ દેશમાં દેખાવકારો હિંસક બની ગયા છે. અનેક વિસ્તારોમાં કાયદો અને વ્યવસ્થાની સ્થિતિ કથળી છે. લૂંટફાટ, આગચંપી અને લિન્ચિંગ (ભીડ દ્વારા હત્યા) ની ઘટનાઓએ માજા મૂકી છે. મીડિયા સંસ્થાઓ, સરકારી કચેરીઓ અને અગ્રણી નેતાઓના નિવાસોને નિશાન બનાવી હુમલા કરવામાં આવી રહ્યા છે, જેના કારણે સામાન્ય જનજીવન ખોરવાયું છે.

પાકિસ્તાનમાં TTP નો આત્મઘાતી હુમલો: બીજી તરફ, પાકિસ્તાનના અશાંત ગણાતા ખૈબર પખ્તૂનખ્વા પ્રાંતના વઝીરિસ્તાન જિલ્લામાં આતંકી સંગઠન તહરીક-એ-તાલિબાન પાકિસ્તાન (TTP) એ સુરક્ષા દળોના કેમ્પ પર ભયાનક હુમલો કર્યો છે.

• હુમલાની રીત: આતંકવાદીઓ વિસ્ફોટકોથી ભરેલું વાહન લઈને આવ્યા હતા અને તેને સુરક્ષા કેમ્પની બહારની દીવાલ સાથે અથડાવ્યું હતું. આ ભીષણ વિસ્ફોટમાં દીવાલ ધરાશાયી થઈ ગઈ હતી અને આસપાસની મસ્જિદ તથા રહેણાંક મકાનોને ભારે નુકસાન થયું હતું.

• જાનહાની: આ હુમલામાં પાકિસ્તાની આર્મીના ૪ જવાન શહીદ થયા છે. સુરક્ષા દળોએ વળતો જવાબ આપી ૪ આતંકીઓને ઠાર કર્યા છે. વિસ્ફોટની ઝપેટમાં આવતા બાળકો અને મહિલાઓ સહિત ૧૫ નાગરિકો ગંભીર રીતે ઘાયલ થયા છે.

રાજદ્વારી તણાવ: પાકિસ્તાની આર્મીએ દાવો કર્યો છે કે આ હુમલાનું કાવતરું અફઘાનિસ્તાનની ધરતી પર ઘડવામાં આવ્યું હતું. પાકિસ્તાને આરોપ લગાવ્યો છે કે તાલિબાન સરકારના દાવા છતાં અફઘાનિસ્તાનમાં આતંકી સંગઠનો સક્રિય છે. આ મામલે પાકિસ્તાને અફઘાનિસ્તાનના ડેપ્યુટી હેડ ઓફ મિશનને તેડું મોકલી કડક વિરોધ નોંધાવ્યો છે અને પોતાની ધરતીનો ઉપયોગ આતંકવાદ માટે ન થવા દેવા તાકીદ કરી છે.

આમ, બંને પાડોશી દેશોમાં ચાલી રહેલી આ અસ્થિરતા સમગ્ર દક્ષિણ એશિયાની સુરક્ષા માટે ચિંતાનો વિષય બની છે.