RSS પર કોંગ્રેસે લગાવ્યા આક્ષેપ, સંઘે કર્યો ઈન્કાર

કોંગ્રેસ અને RSS વચ્ચે એક નવો રાજકીય વિવાદ શરુ થયો છે. ગુરુવારે કોંગ્રેસે ગંભીર આરોપ લગાવ્યો કે, RSS અમેરિકામાં તેના હિતોની હિમાયત કરવા માટે એક એવી લોબિંગ ફર્મની સેવા લઈ રહ્યું છે, જે પાકિસ્તાનની સત્તાવાર લોબિંગ કંપની તરીકે પણ કામ કરે છે. કોંગ્રેસના મહાસચિવ જયરામ રમેશે 'X' પર અમેરિકન સેનેટની લોબિંગ રિપોર્ટનો સ્ક્રીનશૉટ શેર કરીને આ દાવો કર્યો હતો. આ સ્ક્રીનશૉટ મુજબ, અમેરિકન લો ફર્મ 'સ્ક્વેર પેટન બોગ્સ' (SPB), 'સ્ટેટ સ્ટ્રીટ સ્ટ્રેટેજીસ' દ્વારા રાષ્ટ્રીય સ્વયંસેવક સંઘ વતી લોબિંગ કરી રહી છે. જયરામ રમેશે દસ્તાવેજોનો હવાલો આપીને કહ્યું કે, RSS એ અમેરિકામાં પોતાના હિતોની રક્ષા કરવા માટે પાકિસ્તાનની સત્તાવાર લોબિંગ શાખાની સેવા લેવા માટે 'મોટી રકમ' ખર્ચી છે.

રાષ્ટ્રીય હિતો સાથે વિશ્વાસઘાત

કોંગ્રેસે આ આરોપને 'રાષ્ટ્રીય હિતો સાથે વિશ્વાસઘાત' ગણાવ્યો છે. જયરામ રમેશે પોતાના નિવેદનમાં એ પણ યાદ અપાવ્યું કે, થોડા દિવસો પહેલા જ સંઘ પ્રમુખ મોહન ભાગવતે સ્વીકાર્યું હતું કે, RSS એક નોંધાયેલું સંગઠન નથી અને તે કોઈ ટેક્સ ચૂકવતું નથી. કોંગ્રેસના સંચાર મહાસચિવ પવન ખેડાએ વ્યંગ કરતા કહ્યું કે, સંઘ એક એવી કંપનીને કરોડો રૂપિયા આપી રહ્યો છે, જે અમેરિકામાં પાકિસ્તાન માટે પણ લોબિંગનું કામ કરે છે.

સંઘને 'છદ્મ રાષ્ટ્રવાદી સંગઠન' ગણાવ્યું

પાર્ટીની ડિજિટલ મીડિયા વિભાગના પ્રમુખ સુપ્રિયા શ્રીનેતે સવાલ ઉઠાવ્યો કે, જો મોહન ભાગવતના કહેવા મુજબ RSS વ્યક્તિઓનો સમૂહ છે, તો તેને અમેરિકામાં લોબિસ્ટ્સની જરૂર કેમ પડી? તેમણે સંઘ પર 'પોતાનો કલંકિત ઈતિહાસ ધોવા' અને 'દુનિયામાં કટ્ટરતા ફેલાવવા'નો પ્રયાસ કરવાનો આક્ષેપ પણ કર્યો. જયરામ રમેશે સંઘને 'છદ્મ રાષ્ટ્રવાદી સંગઠન' ગણાવ્યું અને કહ્યું કે, RSSનો ઇતિહાસ સ્વતંત્રતા આંદોલન સાથે વિશ્વાસઘાત, મહાત્મા ગાંધી અને આંબેડકરનો વિરોધ તથા બંધારણ અને રાષ્ટ્રીય ધ્વજ પર હુમલો કરવાનો રહ્યો છે.

કોંગ્રેસના આરોપોને RSSએ ફગાવી દીધા

જોકે, RSS એ કોંગ્રેસના આ તમામ આરોપોને સદંતર ફગાવી દીધા છે. RSSના રાષ્ટ્રીય પ્રચાર પ્રમુખ સુનીલ આંબેકરે આ આરોપોને સખત શબ્દોમાં નકારતા કહ્યું કે, " રાષ્ટ્રીય સ્વયંસેવક સંઘ ભારતમાં કામ કરે છે અને તેણે અમેરિકામાં કોઈ લોબિંગ ફર્મની સેવા લીધી નથી." તેમણે સ્પષ્ટ કર્યું કે, લોબિંગ ફર્મ સરકાર સામે કોઈ સંગઠનના હિતોની હિમાયત કરે છે, પરંતુ સંઘે આવી કોઈ કંપનીને હાયર કરી નથી.

કર્ણાટકના CM એ RSS પર પ્રતિબંધ મૂકવાની કરી વાત 

ઉલ્લેખનીય છે કે, આ પહેલા પણ કોંગ્રેસના અધ્યક્ષ મલ્લિકાર્જુન ખડગે અને કર્ણાટકના મુખ્યમંત્રી સિદ્ધારમૈયાએ RSS પર પ્રતિબંધ મૂકવાની વાત કરી હતી. ખડગેએ કહ્યું હતું કે, જો વડાપ્રધાન નરેન્દ્ર મોદી અને ગૃહમંત્રી અમિત શાહ સરદાર વલ્લભભાઈ પટેલના વિચારોનું સન્માન કરતા હોય તો તેમણે RSS પર પ્રતિબંધ મૂકવો જોઈએ.