ભારતમાં હવામાન વિભાગનું તીવ્ર ઠંડીનું એલર્ટ

ગુજરાતમાં કમોસમી વરસાદની વિદાય બાદ હવે ઠંડીનો ચમકારો જોવા મળી રહ્યો છે. રાજ્યના કુલ 19 જિલ્લાઓમાં તાપમાન 20 ડિગ્રી સેલ્સિયસથી નીચે નોંધાતા લોકોએ સવાર-સાંજ ઠંડીનો અનુભવ કર્યો છે. હવામાનમાં આવેલા આ ઝડપી પલટાને કારણે ગુજરાતમાં ઠંડીનો પહેલો રાઉન્ડ શરૂ થયો છે.

વડોદરા સૌથી ઠંડું, અમદાવાદનો પારો પણ ગગડ્યો

રાજ્યમાં સૌથી ઓછું તાપમાન વડોદરામાં 14 ડિગ્રી સેલ્સિયસ નોંધાયું છે, જ્યારે અન્ય મોટા શહેરોમાં પણ પારો નીચે ગયો છે. સુરત, સુરેન્દ્રનગર, પોરબંદર, કંડલા અને દીવ જેવા શહેરોમાં પણ તાપમાન 16 ડિગ્રીથી 17.6 ડિગ્રી વચ્ચે નોંધાયું છે. ગાંધીનગર અને મહુવામાં પણ 14 ડિગ્રી આસપાસ પારો જોવા મળ્યો. 

ઉત્તર ભારતમાં 'શીતલહેર'નું એલર્ટ

ગુજરાતની સાથે સાથે ઉત્તર અને મધ્ય ભારતના રાજ્યોમાં તીવ્ર ઠંડીની શરૂઆત થઈ ચૂકી છે. ભારતીય હવામાન વિભાગ (IMD)એ આગામી  6થી 7 દિવસો માટે કોલ્ડ વેવની ચેતવણી જાહેર કરી છે.

રાજસ્થાનના 12 જિલ્લાઓમાં તાપમાન 10 ડિગ્રીથી નીચે પહોંચી ગયું છે, જેમાં સીકરમાં સૌથી ઓછું 7 ડિગ્રી સેલ્સિયસ નોંધાયું છે. મધ્યપ્રદેશ અને હરિયાણાના રાજગઢમાં 7 ડિગ્રી તાપમાન નોંધાયું છે. પશ્ચિમ મધ્યપ્રદેશ, દક્ષિણ પંજાબ અને દક્ષિણ હરિયાણાના કેટલાક ભાગોમાં રાત્રિનું તાપમાન સામાન્ય કરતાં 4થી 7 ડિગ્રી ઓછું રહેશે.

હિમાચલ પ્રદેશ અને કાશ્મીરના પહાડી વિસ્તારોમાં હિમવર્ષાના કારણે ઉત્તર ભારતના મેદાની વિસ્તારોમાં ઠંડા પવનો ફૂંકાઈ રહ્યા છે.

IMD અનુસાર, તાપમાનમાં ઘટાડો થવાથી ઉત્તરપશ્ચિમ અને તેની આસપાસના મધ્ય ભારતમાં આગામી દિવસોમાં ઠંડી વધુ વધવાની સંભાવના છે.