આજે બંગાળ સરકાર અને એસોસિએશનની બેઠક, 10 દિવસથી ડોકટરો આમરણાંત ઉપવાસ પર

કોલકાતાની આરજી કાર મેડિકલ કોલેજ અને હોસ્પિટલમાં જુનિયર ડોક્ટરના બળાત્કાર અને હત્યાના કેસમાં જુનિયર ડોકટરોના આમરણાંત ઉપવાસ સોમવારે 10મા દિવસમાં પ્રવેશ્યા છે. આ મામલાના ઉકેલ માટે પશ્ચિમ બંગાળ સરકાર અને વિવિધ ડોક્ટર એસોસિએશન વચ્ચે આજે એક મહત્વપૂર્ણ બેઠક યોજાવા જઈ રહી છે.

ઈન્ડિયન મેડિકલ એસોસિએશન (IMA) અને પશ્ચિમ બંગાળના મુખ્ય સચિવ મનોજ પંત વચ્ચે એક મહત્વપૂર્ણ બેઠક નક્કી કરવામાં આવી છે,જેમાં વિવિધ ડોકટર એસોસીએશનનો પણ સમાવેશ કરવામાં આવશે. આ બેઠક સોમવારે બપોરે 12:30 કલાકે કોલકાતાની ઉત્તરી બહારના છેવાડે આવેલા સોલ્ટ લેકમાં સ્થિત રાજ્યના આરોગ્ય વિભાગના મુખ્યાલય સ્વાસ્થ્ય ભવનમાં યોજાશે. આ બેઠકનો હેતુ આ મુદ્દે ચાલી રહેલી મડાગાંઠનો ઉકેલ શોધવાનો છે.

મધ્ય કોલકાતાના એસ્પ્લેનેડ ખાતે સ્ટેજ પર આમરણાંત ઉપવાસ પર બેઠેલા જુનિયર ડોક્ટરોની સંખ્યા હવે ઘટીને છ થઈ ગઈ છે. વાસ્તવમાં, ઉપવાસ પર બેઠેલા ડૉ. પુલસ્ત્ય આચાર્યની તબિયત બગડી હતી, જે બાદ તેમને રવિવારે મોડી રાત્રે હોસ્પિટલમાં દાખલ કરવામાં આવ્યા હતા.

આચાર્યને રવિવારે રાત્રે લગભગ 11 વાગ્યે NRS મેડિકલ કોલેજ અને હોસ્પિટલમાં દાખલ કરવામાં આવ્યા હતા. તે પોતે પણ આ જ હોસ્પિટલમાં જુનિયર ડોક્ટર તરીકે કામ કરે છે. સતત ભૂખ હડતાળને કારણે તેમને પેટમાં તીવ્ર દુખાવો અને ઉલ્ટી થવાની ફરિયાદ હતી.

પુલસ્ત્ય આચાર્ય પહેલા આરજી કારના અનિકેત મહતો, કલકત્તા મેડિકલ કોલેજ અને હોસ્પિટલના અનુસ્તુપ મુખોપાધ્યાય અને દાર્જિલિંગ જિલ્લાના સિલિગુડીમાં ઉત્તર બંગાળ મેડિકલ કોલેજ અને હોસ્પિટલના આલોક વર્માની તબિયત બગડી હતી જેના કારણે તેમને હોસ્પિટલમાં દાખલ કરવામાં આવ્યા હતા.

વિવિધ ખાનગી હોસ્પિટલો સાથે સંકળાયેલા તબીબોએ સોમવારે સવારે 6 વાગ્યાથી પોતપોતાની હોસ્પિટલોમાં આંશિક રીતે કામ બંધ કરી દીધું છે. બુધવારે સવારે 6 વાગ્યા સુધી ડોક્ટરો કામથી દૂર રહેશે. આ સમયગાળા દરમિયાન, આ ખાનગી હોસ્પિટલોમાં ફક્ત ઇમરજન્સી તબીબી સેવાઓ ઉપલબ્ધ રહેશે.