દિલ્હી એરપોર્ટ પર ATC ગ્લિચ, 100 ફ્લાઇટ્સને અસર

દિલ્હીના ઇન્દિરા ગાંધી ઇન્ટરનેશનલ એરપોર્ટ (IGIA) પર શુક્રવારે એર ટ્રાફિક કંટ્રોલ (ATC) સિસ્ટમમાં તકનીકી ખામી સર્જાવાને કારણે ફ્લાઇટ ઓપરેશન્સમાં મોટો અવરોધ ઊભો થયો છે. આ ગ્લિચને કારણે વિવિધ એરલાઇન્સની 100થી વધુ ફ્લાઇટ્સને અસર થઈ છે, જેના પગલે મુસાફરોને એરપોર્ટ પર અને વિમાનની અંદર લાંબો સમય રાહ જોવી પડી હતી.

એડવાઇઝરી જારી

તકનીકી સમસ્યાને કારણે મુસાફરોની હાલાકી વધી જતાં દિલ્હી એરપોર્ટે 'X' પર એક એડવાઇઝરી જારી કરીને જણાવ્યું હતું કે, ATC સિસ્ટમની તકનીકી સમસ્યાને કારણે ફ્લાઇટ ઓપરેશન્સ મોડા પડ્યા છે. તેમની ટીમ આ સમસ્યાને વહેલી તકે ઉકેલવા માટે સક્રિયપણે કામ કરી રહી છે. મુસાફરોને વિનંતી કરવામાં આવી છે કે તેઓ ફ્લાઇટના તાજેતરના અપડેટ્સ માટે સંબંધિત એરલાઇન્સના સંપર્કમાં રહે.

એર ઇન્ડિયા અને ઇન્ડિગો સહિતની મોટી એરલાઇન્સે પણ આ અવરોધની પુષ્ટિ કરી હતી. ઇન્ડિગોએ જણાવ્યું કે આ ખામીના કારણે દિલ્હી અને અનેક ઉત્તરીય પ્રદેશોમાં ફ્લાઇટ ઓપરેશન્સ પ્રભાવિત થયા છે.

મુસાફરોએ વ્યક્ત કરી નારાજગી

ફ્લાઇટ્સના સમયમાં વિલંબ થતાં મુસાફરોએ એરપોર્ટ પર અને વિમાનમાં જ લાંબા સમય સુધી રાહ જોવાની ફરજ પડી હતી. વિલંબિત ફ્લાઇટમાં સવાર એક મુસાફરે જણાવ્યું કે ક્રૂ દ્વારા યાત્રીઓને વિનંતી કરવામાં આવી હતી કે તકનીકી ખામી દૂર ન થાય ત્યાં સુધી ધીરજ જાળવે.

એર ઇન્ડિયાએ મુસાફરોને અપીલ કરી છે કે એરપોર્ટ પર આવતા પહેલાં તેઓ તેમની ફ્લાઇટનું સ્ટેટસ ઓનલાઈન ચેક કરી લે.

અમદાવાદ રૂટ પર અસર

દિલ્હીના ATC ગ્લિચની અસર માત્ર રાષ્ટ્રીય રાજધાની પૂરતી મર્યાદિત ન રહેતા અન્ય એરપોર્ટ પર પણ જોવા મળી છે. સરદાર વલ્લભભાઈ પટેલ ઇન્ટરનેશનલ એરપોર્ટ (SVPIA)ના પ્રવક્તાએ જણાવ્યું હતું કે, દિલ્હીથી અમદાવાદ આવતી 10-15 ફ્લાઇટ્સ પ્રભાવિત થઈ છે. વળી, દિલ્હી એરપોર્ટ પર મેન્યુઅલ વર્કને કારણે અમદાવાદથી દિલ્હી જતી લગભગ 10 ફ્લાઇટ્સ પણ પ્રભાવિત થઈ છે, જેના પગલે મુસાફરોને લાંબા વિલંબનો સામનો કરવો પડ્યો હતો.

સંપૂર્ણ કાર્યક્ષમતા પુનઃસ્થાપિત કરવા પ્રયાસો જારી

નોંધનીય છે કે, આ સપ્તાહની શરૂઆતમાં ચેક-ઇન સિસ્ટમને અસર કરતી થર્ડ-પાર્ટી કનેક્ટિવિટી સમસ્યાને કારણે એરપોર્ટ પર નાની ગરબડી થઈ હતી, જે બાદમાં ઉકેલાઈ ગઈ હતી. જોકે, આજની ATC સિસ્ટમની ખામી તેનાથી અલગ છે અને તેની અસર વધુ મોટી સંખ્યામાં ફ્લાઇટ્સ પર જોવા મળી છે. એરપોર્ટ પર સંપૂર્ણ કાર્યક્ષમતા પુનઃસ્થાપિત કરવા માટે સત્તાવાળાઓ સક્રિયપણે કામગીરી કરી રહ્યા છે.