અમિત શાહ: ભાવનગરમાં નવા ભાજપ કાર્યાલયનું ઉદ્ઘાટન

અમિત શાહે ભાવનગર જિલ્લા ભાજપ કાર્યાલયનું ઉદ્ઘાટન કર્યું : 

કેન્દ્રીય ગૃહમંત્રી અમિત શાહ આજે ભાવનગરની મુલાકાતે આવ્યા હતા. સભા સ્થળે તેમનું આગમન થતાં કેન્દ્રીય મંત્રી નીમુબેન બાંભણિયા, મનસુખ માંડવિયા, કૃષિ મંત્રી જીતુ વાઘાણી અને પ્રદેશ પ્રમુખ જગદીશ પંચાલ સહિતના નેતાઓએ તેમનું સ્વાગત કર્યું હતું.

બિહારની જેમ ભાવનગરમાં સુપડા સાફ કરીશું: અમિત શાહ

સભાને સંબોધતા અમિત શાહે જણાવ્યું હતું કે, બિહારની જેમ ભાવનગરમાં પણ સ્થાનિક સ્વરાજની ચૂંટણીમાં ભાજપ વિરોધીઓના સુપડા સાફ કરી દેશે. તેમણે નવા કાર્યાલયના ભવિષ્યના વિજય માટે અનેક શુભકામનાઓ પાઠવી હતી. ત્યારબાદ તેમણે શહેરના નારી ચોકડી નજીક આવેલા નાના ખોડીયાર મંદિર પાસે જિલ્લા ભાજપના નવનિર્મિત કાર્યાલય 'ભાવ કમલમ'નું વિધિવત ઉદ્‌ઘાટન કર્યું હતું.

કાર્યક્રમમાં અગ્રણી નેતાઓની હાજરી :

આ પ્રસંગે ભાજપ પ્રદેશ પ્રમુખ જગદીશ વિશ્વકર્મા (પંચાલ), કેન્દ્રીય કેબિનેટ મંત્રી મનસુખ માંડવિયા, કેન્દ્રીય રાજ્યમંત્રી નીમુબેન બાંભણીયા, રાજ્યમંત્રી પરષોત્તમ સોલંકી, કેબિનેટ મંત્રી જીતુ વાઘાણી, તેમજ ભાવનગર અને બોટાદ જિલ્લાના ધારાસભ્યો, પદાધિકારીઓ અને બૂથ લેવલના કાર્યકરો ઉપસ્થિત રહ્યા હતા. આ દરમિયાન શહેર ભાજપ પ્રમુખ અને હોદ્દેદારોએ પ્રદેશ અધ્યક્ષ જગદીશ વિશ્વકર્માને પાઘડી પહેરાવી સ્વાગત કર્યું હતું.

એક એક ઘુસણખોરને વીણીવીણીને બહાર કાઢનારી ભાજપ: શાહ

પોતાના સંબોધનમાં અમિત શાહે રાષ્ટ્રીય મુદ્દાઓ પર વાત કરી હતી. તેમણે કહ્યું કે એક તરફ ઘૂસણખોરોને બચાવનારી કોંગ્રેસ પાર્ટી છે અને બીજી તરફ દેશભરમાંથી એક એક ઘુસણખોરને વીણીવીણીને બહાર કાઢનારી ભારતીય જનતા પાર્ટી છે. તેમણે જણાવ્યું કે 2024 પછી અનેક રેકોર્ડ બન્યા છે, જેમાં નરેન્દ્રભાઈ મોદી સતત ત્રીજીવાર વડાપ્રધાન બન્યા, બિહારમાં સતત પાંચમી વાર સરકાર બની, ઓડિશા અને આંધ્રપ્રદેશમાં પહેલીવાર સરકાર બની છે.

કૃષ્ણ કુમારસિંહજી અને સરદાર પટેલને નમન : 

કાર્યકરોની માફી માંગતા તેમણે મોડું થવા છતાં કાર્યકરો ટસના મસ ન થયા તેની પ્રશંસા કરી હતી. તેમણે ભાવનગરના મહારાજા કૃષ્ણ કુમારસિંહજીને યાદ કર્યા હતા, જેમણે દેશ આઝાદ થયો ત્યારે અંગ્રેજોના અંતિમ ષડ્યંત્ર છતાં રજવાડાઓનું વિલીનીકરણ શરૂ કર્યું. તેમણે કહ્યું કે કૃષ્ણ કુમારસિંહજીએ જેની શરૂઆત કરી તેને ભેગું કરવાનું કામ સરદાર વલ્લભભાઈ પટેલે કર્યું. તેમણે સરદાર સાહેબની 150મી જન્મ જયંતીના આ વર્ષે તેમને પ્રણામ કર્યા હતા.