બિહારમાં વિદેશી પ્રવાસીઓથી ભરેલી બસ ખાડામાં ખાબકી

પટના: બિહારના જહાનાબાદમાં બુધવારે સવારે એક ભયાનક માર્ગ અકસ્માત થયો હતો. પટનાથી ગયા જઈ રહેલી બસને હાઈવે ટ્રકે ટક્કર મારી હતી. બસમાં 23 વિદેશી બૌદ્ધ ભિક્ષુકો હતા. જેમાં આઠ ઘાયલ થયા હતા. તેને સદર હોસ્પિટલમાં દાખલ કરવામાં આવ્યા હતા. જેમાંથી ત્રણની હાલત ગંભીર છે. તેમને પટનાની પીએમસીએચ હોસ્પિટલમાં રિફર કરવામાં આવ્યા છે. પોલીસે જણાવ્યું કે, જ્યારે પૂછપરછ કરવામાં આવી ત્યારે બૌદ્ધ સાધુઓની ભાષા પણ સમજી શકાઈ ન હતી.   પોલીસના જણાવ્યા અનુસાર, આ અકસ્માત NH-83 પર સલેમપુર ગામ પાસે થયો હતો. અથડામણને કારણે બસ બેકાબૂ થતાં ખાડામાં પડી હતી.અકસ્માતની માહિતી મળતા સ્થાનિક લોકો અકસ્માત સ્થળે પહોંચી ગયા હતા. આ પછી પોલીસને જાણ કરવામાં આવી હતી.   સ્થાનિકોના જણાવ્યા અનુસાર, આ રોડની હાલત ખુબ જ ખરાબ છે. વહીવટીતંત્ર પણ આ રોડના સમારકામ માટે કોઈ પગલાં લઈ રહ્યું નથી. સ્થાનિક લોકોએ એવી પણ ફરિયાદ કરી છે કે ટ્રાફિક પોલીસ ટ્રાફિકના નિયમોનું પાલન કરવાને બદલે પૈસા પડાવવામાં વ્યસ્ત છે.   પોલીસના જણાવ્યા અનુસાર, ઘાયલોમાં વિયેતનામ, મ્યાનમાર અને અમેરિકાના પ્રવાસીઓનો સમાવેશ થાય છે. તમામને જહાનાબાદની સદર હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે.   --IANS