અમદાવાદ-થરાદ વચ્ચે 6 લેન હાઇસ્પીડ રોડ કોરિડોર બનાવવામાં આવશે

વડાપ્રધાન નરેન્દ્ર મોદીની અધ્યક્ષતામાં મળેલી કેબિનેટ બેઠકમાં ગુજરાતને મોટી ભેટ આપવામાં આવી છે. અમદાવાદ થરાદ વચ્ચે 6 લેન હાઈ સ્પીડ રોડ કોરીડોર પ્રોજેક્ટને કેન્દ્ર સરકારે મંજૂરી આપી છે.

ઈન્ફ્રાસ્ટ્રક્ચરને મજબૂત કરવાની દિશામાં કેન્દ્ર સરકારે મોટો નિર્ણય લીધો છે. કેન્દ્રીય કેબિનેટે 50,655 કરોડના ખર્ચે 936 કિલોમીટરના 8 મહત્વના નેશનલ હાઈ સ્પીડ રોડ કોરિડોર પ્રોજેક્ટને મંજૂરી આપી છે.

50,655 કરોડના ખર્ચે 8 હાઈ સ્પીડ રોડ કોરિડોર બનાવાશે :

રેલવે મંત્રી અશ્વિની વૈષ્ણવે જણાવ્યુ કે, 50,655 કરોડના ખર્ચે 936 કિલોમીટરના 8 નેશનલ હાઈ સ્પીડ રોડ કોરિડોર પ્રોજેક્ટની પરિયોજનાને મંજૂરી આપવામાં આવી છે. દેશમાં લોજિસ્ટિક્સ કાર્યક્ષમતામાં સુધારો કરવાની સાથે ટ્રાફિક ઘટાડવા અને કનેક્ટિવિટી વધારવામાં નેશનલ હાઈ સ્પીડ કોરિડોર વધુ ઉપયોગી બનશે.

થરાદ-અમદાવાદ સિક્સ લેન હાઇવેની ખાસિયતો :

થરાદ-અમદાવાદ વચ્ચે 214 કિલોમીટર લાંબો નેશનલ હાઇ સ્પીડ રોડ કોરિડોર નિર્માણ પામશે. કેન્દ્રીય પરિવહન મંત્રી નીતિન ગડકરીના જણાવ્યા અનુસાર આ હાઇવેનો કુલ ખર્ચ 10,534 કરોડ રૂપિયા થશે. 

હાઇસ્પીડ રોડ કોરિડોરનો ડીસા, પાલનપુર, મહેસાણા શહેરને લાભ મળશે. SEZ વિસ્તારો, ફાર્મા તથા ઈલેક્ટ્રોનિક ક્લસ્ટર્સને સારી કનેક્ટિવિટી મળી રહેશે. કેન્દ્ર સરકારે દાવો કર્યો છે કે કોરિડોર બન્યા બાદ માલસામાનની હેરફેરનો સમય પાંચથી છ કલાક ઘટીને ત્રણથી સાડા ત્રણ કલાક થઈ જશે. આ ઉપરાંત ઉત્તર ગુજરાતનાં લોકોને મુંબઈની સારી કનેક્ટિવિટી મળશે.

ક્યાં હાઇ સ્પીડ કોરિડોર પ્રોજેક્ટને મંજૂરી મળી ? : 

6 લેન આગ્રા-ગ્વાલિયર નેશનલ હાઇ સ્પીડ કોરિડોર

4 લેન ખડગપુર-મોરેગ્રામ નેશનલ હાઇ સ્પીડ કોરિડોર

6 લેન થરાદ-ડીસા-મહેસાણા-અમદાવાદ નેશનલ હાઇ સ્પીડ કોરિડોર

4 લેન અયોધ્યા રિંગ રોડ

4 લેન પાથલગાંવ અને ગુમલા રાયપુર-રાંચી નેશનલ હાઇ સ્પીડ કોરિડોર

6 લેન કાનપુર રિંગ રોડ

4 લેન ઉત્તર ગુવાહાટી બાયપાસ અને હાલના ગુવાહાટી બાયપાસને પહોળો કરાશે

8 લેન પુણે નજીક એલિવેટેડ નાસિક ફાટા-ખેડ કોરિડોર