ઇન્દોરમાં બસ ખીણમાં ખાબકતા 3નાં મોત, 38 ઘાયલ

મધ્યપ્રદેશના ઇન્દોર જિલ્લામાં રવિવારે રાત્રે એક ગમખ્વાર માર્ગ અકસ્માત થયો હતો, જેમાં એક મુસાફર બસ અનિયંત્રિત થઈને ઊંડી ખીણમાં ખાબકી હતી. આ દુર્ઘટનામાં બે મહિલાઓ સહિત કુલ ત્રણ લોકોના કરુણ મોત નિપજ્યા હતા, જ્યારે અન્ય 38 મુસાફરો ઘાયલ થયા હતા.

ગ્રામીણ પોલીસ અધીક્ષક (SP) યાંગચેન ડોલકર ભૂટિયાએ આ માહિતી આપતા જણાવ્યું હતું કે, આ દુર્ઘટના સિમરોલ પોલીસ સ્ટેશન વિસ્તાર હેઠળ આવતા ભેરુ ઘાટ પર બની હતી. તેમણે ઉમેર્યું, "જે ત્રણ લોકોના મોત થયા છે, તેઓ બસમાં આગળની સીટ પર બેઠા હતા. મૃતકોની ઓળખ કરવાની કાર્યવાહી હાલ ચાલી રહી છે."

પોલીસ અને પ્રશાસનની ટીમોએ તાત્કાલિક ઘટનાસ્થળે પહોંચીને બચાવ કામગીરી હાથ ધરી હતી અને બસમાં ફસાયેલા 38 ઘાયલ મુસાફરોને બહાર કાઢ્યા હતા. તમામ ઘાયલોને તાત્કાલિક સારવાર માટે ઇન્દોરની જુદી-જુદી હોસ્પિટલોમાં ખસેડવામાં આવ્યા છે.

 નશામાં ડ્રાઇવિંગની આશંકા:

અકસ્માતના ચોક્કસ કારણની તપાસ ચાલી રહી છે, પરંતુ ઘટનાસ્થળ પરના એક વીડિયોમાં એક પ્રત્યક્ષદર્શી એવો આક્ષેપ કરતા સંભળાય છે કે બસનો ડ્રાઇવર નશાની હાલતમાં હતો, જેના કારણે આ ગંભીર દુર્ઘટના બની.

 મુખ્યમંત્રીની સહાયની જાહેરાત:

રાજ્યના મુખ્યમંત્રી મોહન યાદવે આ દર્દનાક બસ દુર્ઘટના પર ઊંડી સંવેદના વ્યક્ત કરી છે. તેમણે મૃત્યુ પામેલા ત્રણેય લોકોના પરિવારોને ₹ 2-2 લાખની આર્થિક સહાય આપવાની જાહેરાત કરી છે અને ઘાયલોના ઝડપથી સાજા થવાની કામના કરી છે.