વિજય હજારે ટ્રોફી: હાર્દિક પંડ્યાએ રાજકોટમાં મચાવી ધમાલ, માત્ર 68 બોલમાં ફટકારી આક્રમક સદી
રાજકોટના નિરંજન શાહ સ્ટેડિયમમાં રમાઈ રહેલી વિજય હજારે ટ્રોફી 2025-26માં ભારતીય ઓલરાઉન્ડર હાર્દિક પંડ્યાએ બેટિંગમાં આતશબાજી કરી છે. બરોડા તરફથી રમતા પંડ્યાએ વિદર્ભના બોલરોની જોરદાર ધોલાઈ કરી માત્ર 68 બોલમાં પોતાની સદી પૂર્ણ કરી હતી.
મુશ્કેલ સમયે સંભાળી બાજી :&nbsp;
જ્યારે હાર્દિક પંડ્યા બેટિંગ કરવા મેદાનમાં ઉતાર્યા ત્યારે બરોડાની સ્થિતિ અત્યંત નાજુક હતી. ટીમે માત્ર 71 રનમાં પોતાની 5 મહત્વની વિકેટ ગુમાવી દીધી હતી. સાતમા નંબરે બેટિંગમાં આવેલા પંડ્યાએ શરૂઆતમાં સંયમપૂર્વક રમત રમી હતી, પરંતુ ત્યારબાદ આક્રમક વલણ અપનાવ્યું હતું. તેમણે 39મી ઓવરમાં સ્પીનર પાર્થ રેખાડેના બોલ પર 5 છગ્ગા અને 1 ચોગ્ગો ફટકારીને એક જ ઓવરમાં 34 રન ઝૂડી કાઢ્યા હતા.
રેકોર્ડબ્રેક ઇનિંગ :&nbsp;
હાર્દિક પંડ્યાએ પોતાની શાનદાર ઇનિંગ દરમિયાન કુલ 93 બોલમાં 133 રન બનાવ્યા હતા. આ ઇનિંગમાં તેમણે 11 ગગનચુંબી છગ્ગા અને 4 ચોગ્ગા ફટકાર્યા હતા. લિસ્ટ-એ ક્રિકેટમાં આ તેમનો સર્વશ્રેષ્ઠ સ્કોર છે. આ અગાઉ તેમનો શ્રેષ્ઠ સ્કોર ઓસ્ટ્રેલિયા સામે 92 રન અણનમ હતો. લાંબા સમય બાદ 50 ઓવરના ફોર્મેટમાં પરત ફરેલા હાર્દિકે પોતાની ફિટનેસ અને ફોર્મની સાબિતી આપી દીધી છે.
બરોડાનો પડકારજનક સ્કોર :&nbsp;
હાર્દિક પંડ્યાની આ વિસ્ફોટક બેટિંગના દમ પર બરોડાની ટીમે નિર્ધારિત 50 ઓવરમાં 9 વિકેટના નુકસાન પર 293 રનનો મજબૂત સ્કોર બનાવ્યો છે. વિદર્ભ તરફથી વાય.આર. ઠાકુરે સૌથી વધુ ચાર વિકેટ ઝડપી હતી, પરંતુ હાર્દિકના આક્રમણ સામે વિદર્ભના બોલરો લાચાર દેખાતા હતા.

રાજકોટમાં હાર્દિક પંડ્યાએ માત્ર 68 બોલમાં સદી ફટકારી વિદર્ભ સામે બરોડાને ઉગાર્યું

January 3, 2026 | 22:17 IST