ગુજરાતની અત્યાર સુધીની સૌથી મોટી પોલો ઈવેન્ટ &lsquo;અમદાવાદ પોલો ટુર્નામેન્ટ&rsquo; રવિવારે રાત્રે તેના ભવ્ય અને રોમાંચક ફિનાલે સાથે સંપન્ન થઈ છે. અમદાવાદીઓએ પોતાના ઘર આંગણે રોયલ ગેમ નિહાળીને આણંદ માણ્યો.&nbsp;
શેલા સ્થિત ગુજરાત પોલો ક્લબ ગ્રાઉન્ડ ખાતે રમાયેલી આ ટુર્નામેન્ટે ન માત્ર રમતગમત પ્રેમીઓને આકર્ષ્યા, પરંતુ ગુજરાતમાં &lsquo;ધી કિંગ ઓફ ગેમ્સ&rsquo; તરીકે ઓળખાતી પોલો રમતના પુનરુત્થાનનો મજબૂત પાયો પણ નાખ્યો છે. પોલોને ખેલાડીઓ માટે નવા દર્શક માટે અને ખાસ કરીને આ યુવા પેઢી આકર્ષાય તે ઈરાદાથી આ ખેલનો મેદાનમાં મજબૂત કમબેક કરાયો.&nbsp;
ટુર્નામેન્ટની સૌથી આકર્ષક એવી પુરુષોની ફાઈનલ મેચ મેફેર પોલો અને પુણે વોરિયર્સ વચ્ચે રમાઈ હતી. નિયમિત સમયના અંતે બંને ટીમો 7-7ના સ્કોર સાથે ટાઈ પર હતી. જોકે, વધારાના સમયમાં પુણે વોરિયર્સના લાન્સ વૉટસને શાનદાર &lsquo;ગોલ્ડન ગોલ&rsquo; ફટકારીને પોતાની ટીમને 8-7થી ઐતિહાસિક વિજય અપાવ્યો હતો. લાન્સ વૉટસને આખી મેચમાં કુલ 7 ગોલ કરીને મેદાન ગજવ્યું હતું.
મહિલા શક્તિનો દબદબો: 
ફિનાલેના દિવસે મહિલા ટીમો વચ્ચેનો મુકાબલો પણ આકર્ષણનું કેન્દ્ર રહ્યો હતો. લાયન્સ ડેન લિજેન્ડ્સ અને એપોલો એવિએટર્સ વચ્ચે રમાયેલી મેચમાં લાયન્સ ડેન લિજેન્ડ્સે 4- 3થી નજીવી જીત મેળવી હતી. વિજેતા ટીમ તરફથી ડો. શિવાંગી જયસિંઘે 3 ગોલ કરીને ટીમને જીત તરફ દોરી હતી, જ્યારે એપોલો એવિએટર્સ વતી સંજુલા માનના 3 ગોલ એળે ગયા હતા.
ગ્લેમરસ ક્લોઝિંગ સેરેમની: 
અદાણી ગ્રુપ દ્વારા સંચાલિત આ ટુર્નામેન્ટના સમાપન સમારોહમાં ટ્રોન એક્ટ, સાંસ્કૃતિક નૃત્યો અને ઘોડેસવારીના કૌશલ્ય પ્રદર્શને પ્રેક્ષકોને મંત્રમુગ્ધ કર્યા હતા. 
ગુજરાત પોલો ક્લબના પ્રમોટર અર્પણ ગુપ્તા અને સંજય પાલડિયાએ જણાવ્યું હતું કે, આ ટુર્નામેન્ટને મળેલો અભૂતપૂર્વ પ્રતિસાદ સાબિત કરે છે કે અમદાવાદ આંતરરાષ્ટ્રીય સ્તરની પોલો ટુર્નામેન્ટના આયોજન માટે સક્ષમ છે. ઇનામ વિતરણ અને ભવ્ય આતશબાજી સાથે આ ત્રણ દિવસીય સ્પોર્ટ્સ કાર્નિવલની પૂર્ણાહુતિ થઈ હતી.

પોલોનું અમદાવાદમાં ભવ્ય ફિનાલે

ગોલ્ડન ગોલ સાથે રોમાંચક ફાઈનલમાં મેફેર પોલોને હરાવી; 'કિંગ ઓફ ગેમ્સ' પોલોનો શાનદાર કમબેક

January 5, 2026 | 23:02 IST