ગુજરાતની નિર્દયતા: દિકરીઓની પીડા સામે મૌન

ગુજરાતની દસ વર્ષની નાની બાળકી પર બળાત્કાર થયો તોય ગુજરાતીઓનું રૂવાડું ન ફરક્યુ કે તેમના મોઢામાંથી ચિત્કાર ન નીકળ્યો, મીણબત્તી યાત્રાઓ તો ગુજરાતીઓ માત્ર દિલ્લી ને કોલકત્તાની દિકરીઓ માટે જ કાઢે, ગુજરાતની બહેન દિકરીઓની પીડા કે દર્દ તેમને નહી સંભળાય કે તેને ન્યાય અપાવવા રસ્તા ઉપર ક્યારેય ઉતરશે નહીં.

તંત્ર ઘોરે છે તો ગુજરાતીઓ ડબલ ઘોરે છે, જે રીતે ગુજરાતીઓની સંવેદનાઓ મરી રહી છે તે જોતા ક્યારેક ક્યારેક તો ડર લાગે છે, કે ક્યાંક કોઇકના મુખેથી એવું સાંભળવા ન મળે કે, "બડે બડે દેશમે ઐસી છોટી છોટી ઘટનાએ હોતી રહેતી હૈ."

જે ગુજરાતમાં સ્ત્રી સામે આટલા અત્યાચાર નહતાં થતાં, તેટલા અત્યાચાર અત્યારે થઇ રહ્યાં છે, આપડે આંકડાંમાં નથી પડવું, પણ વધી રહ્યાં છે, તે નરી વાસ્તવિક્તા છે, પણ ગુજરાતીઓ નીંદરમાંથી નથી જાગ્યા, આપણી આ વર્તણુંક જોઇ, મહાભારતનો પ્રસંગ યાદ આવે છે, મહાભારત કાળમાં ભરી સભામાં દ્રોપદીનું ચિરણ હરણ થયું હતું. ત્યારે માત્ર રાજા ધૃતરાષ્ટ્ર જ આંધળા હતાં, જો કે એ સભામા ભિષ્મપિતામહ, કૃપાચાર્ય અને તાત વિદુરે પણ આંખે પાટા બાંધ્યાની ભૂમીકા નિભાવી.

ગુજરાતમાં ગુન્હા થયા પછી કોઇ પણ ચમરબંધીને છોડવામાં આવતાં નથી. પરંતુ ગુન્હા થતાં પણ જોઇ તેટલા રોકવામાં આવતાં નથી. વાત પ્રીવેન્ટીવ પોલીસીંગની છે, જે હવે નામ શેષ થતું જાય છે, શિવાય કે ડ્રગ્સ પકડવાનું કે આતંકવાદી પકડવાના હોય, તે ઓપરેશનો બધા સફળતાં પૂર્વક થાય છે, બસ બહેન-દિકરીઓને એટલી સ્ફૂરતાથી સુરક્ષા આપી શક્તા નથી. લૂલો બચાવ પણ થઇ શકે કે પોલીસ મહેકમ ઓછું છે, જોઇ તેટલું પેટ્રોલિંગ થઇ શક્તું નથી. તેના સામે તમે જોશો કે વિવિઆઇપીઓની મુલાકાત હોય તો દુનિયા આખાની પોલીસ ઠાલવી દેવાય છે.

આ રાજય અને દેશમાં બહેન દિકરીઓની સલામતી કરતાં વિવિઆઇપીઓની સુરક્ષાને વધુ પ્રાથમીકતા આપવામાં આવી છે.

બિજી એક દુખદ બાબતે એ છે કોઇ પણ ઘટનાના પીડીત પરીવાર રાજકારણીઓ માટે પીકનીક સ્પોટ થઇ ગયા છે. આ ઘટનામાં પણ પીડીત પરીવારની મુલાકાત લેવા નેતાઓ પહોંચી ગયાં હતાં. સવાલ એ છે કે જેમને ચૂંટીને મોકલો, પછી તે સત્તા પક્ષ પર હોય વિપક્ષમાં શું તેમની જવાબદારી નથી તંત્ર પર એવો દાબ હોય કે આવી ઘટના જ ન બને, પણ એવુ થતું નથી, કારણકે પ્રજા તેમને સવાલ કરતી નથી, અને પ્રજાના પ્રતિનિધિઓ એવું માનવા માંડ્યા છે કે તે દેશના માલિક થઇ ગયાં છે, કોઇને જવાબદેહી નથી.

પ્રજાને તો ખરેખર શું ચાલી રહ્યું છે તે જ ખબર નથી. તમે નહી માનો, તો જુઓ આ દાખલો, અગર કોઇ પોલીસ સ્ટેશન વિસ્તારમાંથી એક લાખ કરતાં વધુ કિંમતનો વિદેશી દારૂ પકડાય, તો, જે તે પોલીસ સ્ટેશનન ઇન્સપેક્ટરને સસ્પેન્ડ કરવામાં આવે છે. ક્યારેય સાંભળ્યું છે કે કોઇ દિકરી પર બળાત્કાર થયો તો તે વિસ્તારના પોલીસ સ્ટેશનના ઇન્સપેક્ટરને સસ્પેન્ડ કરવામા આવ્યાં હોય. બહેન દિકરીઓની સુરક્ષા અને સશક્તિકરણની ખોખલી વાતો કરતાં આ રાજનેતાઓ માટે નશાબંધી કાયદાનો ભંગ થાય, તેની કિંમત, એક દિકરીની ઇજ્જત લૂંટાઇ તેનાથી વધુ છે, તમે, હું અને આપણે સૌ મહાભારતકાળની સભાના ભિષ્મપિતામહ, તાત વિદુર અને કૃપાચાર્યા બની ગયાં છીએ.