યુનિયન પબ્લિક સર્વિસ કમિશન દ્વારા UPSC મેઈન્સ 2025 પરીક્ષાનું પરિણામ જાહેર કરી દેવામાં આવ્યું છે. લાંબા સમયથી આ પરિણામની રાહ જોઈ રહેલા ઉમેદવારો માટે આ એક મોટા સમાચાર છે. પરીક્ષામાં હાજર રહેલા તમામ ઉમેદવારો સંઘ લોક સેવા આયોગની સત્તાવાર વેબસાઇટ upsc.gov.in પર જઈને પોતાનું પરિણામ ચકાસી શકે છે. આ સિવિલ સેવા પરીક્ષામાં જે ઉમેદવારો સફળ થયા છે, તેમને હવે UPSC ઇન્ટરવ્યૂમાં બેસવાની તક મળશે.
પરીક્ષામાં કુલ 2,736 ઉમેદવારોએ મારી બાજી&nbsp;
UPSC મેઈન્સ પરીક્ષાનું આયોજન 22 ઓગસ્ટથી 31 ઓગસ્ટ, 2025 દરમિયાન 2 શિફ્ટમાં કરવામાં આવ્યું હતું. આ પરીક્ષામાં કુલ 2,736 ઉમેદવારોએ બાજી મારી છે. આ તમામ સફળ ઉમેદવારોને હવે ઇન્ડિયન એડમિનિસ્ટ્રેટિવ સર્વિસ, ઈન્ડિયન ફોરેન સર્વિસ, ઇન્ડિયન પોલીસ સર્વિસ અને અન્ય કેન્દ્રીય સેવાઓમાં નોકરી કરવાની તક મળશે. જોકે, તે પહેલા આ તમામ ઉમેદવારોને ઈન્ટરવ્યૂ માટે બોલાવવામાં આવશે. આ ઈન્ટરવ્યૂ દિલ્હીમાં સ્થિત સંઘ લોક સેવા આયોગના મુખ્યાલય ખાતે યોજાશે, જેની વિગતવાર માહિતી ઉમેદવારોને ટૂંક સમયમાં આપવામાં આવશે.
આ પણ વાંચો: <a href="https://www.benefitnews24.com/gujarati/gujarat/is-upsc-paper-sale-on-social-media-a-rumor-or-a-fact-teacher-reveals/12300" target="_blank" rel="noopener">સોશિયલ મીડિયા પર UPSC પેપર વેચાણની અફવા કે હકીકત?, શિક્ષકે કર્યો ખુલાસો</a>
ઉમેદવારો પોતાનું પરિણામ ચકાસવા માટે નીચે મુજબના સ્ટેપ્સ ફોલો કરી શકે છે.
1. સૌથી પહેલા UPSCની સત્તાવાર વેબસાઇટ upsc.gov.in પર જવું.
2. વેબસાઈટના હોમ પેજ પર 'UPSC સિવિલ સેવા મેઈન્સ રિઝલ્ટ 2025'ની લિંક દેખાશે, તેના પર ક્લિક કરવું.
3. અહીં ક્લિક કર્યા પછી ઉમેદવારે પોતાનો રજિસ્ટ્રેશન નંબર દાખલ કરવો પડશે, ત્યારબાદ એક PDF ફાઈલ ખુલશે.
4. આ PDF ફાઈલમાં સફળ ઉમેદવારોના રોલ નંબર આપવામાં આવેલા હશે. પરિણામ જોયા પછી તમે આ PDF ફાઈલને ડાઉનલોડ પણ કરી શકો છો.
ઈન્ટરવ્યૂ પછી અંતિમ પસંદગીની કરાશે જાહેરાત
સંઘ લોક સેવા આયોગ દ્વારા સિવિલ સેવા પરીક્ષા કુલ 3 તબક્કામાં લેવામાં આવે છે. પહેલો તબક્કો પ્રિલિમ્સ પરીક્ષાનો હોય છે, જેમાં પાસ થનાર ઉમેદવારોને મેઈન્સ પરીક્ષામાં બેસવાનો મોકો મળે છે. આ પછી ત્રીજો અને અંતિમ તબક્કો ઈન્ટરવ્યૂનો હોય છે. ઈન્ટરવ્યૂ પછી અંતિમ પસંદગીની જાહેરાત કરવામાં આવે છે. ઈન્ટરવ્યૂ અને અન્ય માહિતી માટે ઉમેદવારો આયોગની સત્તાવાર વેબસાઈટ પર નોટિફિકેશન નિયમિતપણે ચકાસી શકે છે.

UPSC મેઈન્સ પરીક્ષા

UPSC મેઈન્સ પરીક્ષા 2025નું પરિણામ જાહેર, જેમાં કુલ 2,736 ઉમેદવારોએ બાજી મારી

November 12, 2025 | 20:45 IST