SOUના મૂર્તિકાર રામ સુતારનું 100 વર્ષની વયે નિધન

ભારતના કલા જગતના વિશ્વપ્રસિદ્ધ મૂર્તિકાર અને સ્ટેચ્યુ ઓફ યુનિટીના સર્જક રામ સુતારનું 17 ડિસેમ્બર 2025ની મધ્યરાત્રિએ નોઈડા સ્થિત તેમના નિવાસ્થાને અવસાન થયું છે. 100 વર્ષની વયે અંતિમ શ્વાસ લેનાર આ મહાન કલાકારે પોતાના 7 દાયકાથી વધુ લાંબા કાર્યકાળ દરમિયાન ભારતને વિશ્વ સ્તરે ગૌરવ અપાવ્યું છે. તેમના નિધનથી દેશના કલા અને શિલ્પ ક્ષેત્રમાં ક્યારેય ન પુરાય તેવી ખોટ પડી છે.

રામ સુતારની કલાએ સમગ્ર વિશ્વમાં ખ્યાતિ મેળવી

રામ સુતારના નોંધપાત્ર યોગદાન બદલ ભારત સરકાર દ્વારા તેમને અનેક પ્રતિષ્ઠિત પુરસ્કારોથી નવાજવામાં આવ્યા હતા. તેમને પદ્મશ્રી, પદ્મ ભૂષણ અને પદ્મ વિભૂષણ જેવા સર્વોચ્ચ નાગરિક સન્માનો પ્રાપ્ત થયા હતા. વર્ષ 2019માં કલાના ક્ષેત્રમાં તેમની અપ્રતિમ સેવાઓને ધ્યાનમાં રાખીને તેમને ભારતના સર્વોચ્ચ નાગરિક પુરસ્કાર 'ભારત રત્ન' થી સન્માનિત કરવામાં આવ્યા હતા. તેમની કલાએ માત્ર ભારત જ નહિ પરંતુ સમગ્ર વિશ્વમાં ખ્યાતિ મેળવી છે.

કલા પ્રેમીઓ એ શ્રદ્ધાંજલિ આપી

તેમના પુત્ર અનિલ સુતારે પિતાના નિધનની પુષ્ટિ કરતા ભાવુક સંદેશ પાઠવ્યો હતો. અનિલ સુતારે જણાવ્યું કે, રામ સુતારનું નિધન તેમના નોઈડાના ઘરે જ થયું છે અને તેમના અંતિમ સંસ્કાર 18 ડિસેમ્બરના રોજ સવારે 11:00 વાગ્યે કરવામાં આવશે. અંતિમ યાત્રા સેક્ટર 19 થી શરૂ થઈને સેક્ટર 94 ના અંતિમ વિશ્રામ સ્થળ સુધી જશે, જ્યાં કલા પ્રેમીઓ અને અગ્રણી નેતાઓ તેમને શ્રદ્ધાંજલિ આપવા ઉમટી પડશે.

આ પણ વાંચો: SOU ની એક મહિનામાં 2.50 લાખથી વધુ લોકોએ લીધી મુલાકાત

'સ્ટેચ્યુ ઓફ યુનિટી' વિશ્વની સૌથી ઊંચી પ્રતિમા

રામ સુતારનો જન્મ 19 ફેબ્રુઆરી 1925ના રોજ ગુજરાતના ગોધરામાં થયો હતો. એક સામાન્ય પરિવારમાંથી આવીને તેમણે પોતાની મહેનત અને કલાના જોરે વિશ્વના સૌથી પ્રખ્યાત મૂર્તિકાર તરીકેની ઓળખ બનાવી હતી. ગુજરાત સાથે તેમનો અતૂટ નાતો રહ્યો હતો, જે તેમની સૌથી મોટી કૃતિ 'સ્ટેચ્યુ ઓફ યુનિટી' માં પ્રતિબિંબિત થાય છે. સરદાર વલ્લભભાઈ પટેલની આ 182 મીટર ઊંચી પ્રતિમા આજે વિશ્વની સૌથી ઊંચી પ્રતિમા તરીકે ભારતનું મસ્તક ગર્વથી ઊંચું કરી રહી છે.

મહાત્મા ગાંધીની 350 થી વધુ પ્રતિમા બનાવી

તેમણે માત્ર સરદાર પટેલ જ નહીં પરંતુ મહાત્મા ગાંધીની પણ 350 થી વધુ પ્રતિમાઓ બનાવી છે, જે ભારત સહિત વિશ્વના વિવિધ દેશોમાં સ્થાપિત છે. આ ઉપરાંત રામ સુતાર દ્વારા નિર્મિત ડૉ. બાબાસાહેબ આંબેડકરની અનેક પ્રતિમાઓ દેશના ખૂણે ખૂણે જોવા મળે છે, જેમાં મુંબઈના ચૈત્યભૂમિ ખાતેની પ્રતિમા ખૂબ જ પ્રખ્યાત છે. બેંગલુરુમાં સ્થિત ભગવાન શિવની 153 ફૂટ ઊંચી પ્રતિમા પણ તેમની અદભૂત કલાનું જ પરિણામ છે.

પથ્થરોમાં પ્રાણ ફૂંકનાર શિલ્પકાર

પુણેના મોશીમાં આવેલી છત્રપતિ સંભાજી મહારાજની 100 ફૂટ ઊંચી પ્રતિમા પણ રામ સુતારની શ્રેષ્ઠ કૃતિઓમાંની એક માનવામાં આવે છે. 100 વર્ષના લાંબા આયુષ્યમાં તેમણે હજારો પ્રતિમાઓ દ્વારા ઈતિહાસને જીવંત રાખવાનું કામ કર્યું છે. કલા પ્રત્યેનું તેમનું સમર્પણ આવનારી પેઢીઓ માટે હંમેશા પ્રેરણારૂપ બની રહેશે. આ મહાન શિલ્પકાર જે પથ્થરોમાં પ્રાણ ફૂંકીને ભારતની વિરાસતને અમર બનાવી છે.