નરેન્દ્ર મોદી સ્ટેડિયમને બોમ્બથી ઉડાવવાની ધમકી: અમદાવાદ પોલીસ એલર્ટ

અમદાવાદના નરેન્દ્ર મોદી સ્ટેડિયમને બોમ્બથી ઉડાવી દેવાની ધમકીભર્યો ઇ-મેલ મળ્યો છે. ગુજરાત ક્રિકેટ એસોસિએશન (GCA)ને પાકિસ્તાનના નામે મળેલા આ ઇ-મેલમાં સ્ટેડિયમને બ્લાસ્ટ કરવાની ધમકી આપવામાં આવી છે. ઇ-મેલમાં લખવામાં આવ્યું છે, "We Will Blast Your Studium." આ ઘટનાની જાણ થતાં જ અમદાવાદ પોલીસે તાત્કાલિક કાર્યવાહી શરૂ કરી દીધી છે.   GCAને આ ધમકીભર્યો ઇ-મેલ થોડા સમય પહેલાં મળ્યો હતો, જેની જાણ તુરંત અમદાવાદ પોલીસને કરવામાં આવી. પોલીસના ઉચ્ચ અધિકારીઓની ટીમ અને બોમ્બ-સ્ક્વોડે સ્ટેડિયમમાં વ્યાપક ચેકિંગ હાથ ધર્યું છે. સિનિયર IPS અધિકારીએ જણાવ્યું કે, "આ ઇ-મેલ 'પાકિસ્તાન જેક' નામના વ્યક્તિ કે સંગઠનના નામે મળ્યો છે, જેમાં એક જ લાઇનમાં ધમકી આપવામાં આવી છે. આવનારા દિવસોમાં IPLની મેચો યોજાવાની હોવાથી આ ધમકીને ગંભીરતાથી લઈને તમામ જરૂરી પગલાં લેવામાં આવી રહ્યાં છે."   નરેન્દ્ર મોદી સ્ટેડિયમ દેશનું સૌથી મોટું ક્રિકેટ સ્ટેડિયમ છે અને અહીં યોજાતી IPL મેચો દરમિયાન મોટી સંખ્યામાં દર્શકો ઉપસ્થિત રહે છે. આવી સ્થિતિમાં સુરક્ષાને લઈને કોઈપણ જોખમ ન લેવાય તે માટે પોલીસ અને સંબંધિત એજન્સીઓ દ્વારા સઘન તપાસ અને સુરક્ષા વ્યવસ્થા કરવામાં આવી રહી છે.   અમદાવાદ પોલીસે આ ઇ-મેલની સત્યતા અને તેના સ્ત્રોતની તપાસ શરૂ કરી છે. હાલ સ્ટેડિયમ અને તેની આસપાસના વિસ્તારોમાં સુરક્ષા વધારી દેવામાં આવી છે. આ ઘટના અંગે વધુ માહિતી મળે તેની રાહ જોવાઈ રહી છે.