વિસનગર નગરપાલિકાના શિક્ષણ સમિતિના ચેરમેને ભાંગરો વાટ્યો

ભાજપ શાસિત વિસનગર નગરપાલિકાના શિક્ષણ સમિતિના ચેરમેન મનિષ બારોટને પ્રજાસત્તાક અને સ્વતંત્રતા દિવસ અંગે જાણ નહી હોવાનું સામે આવ્યુ છે. મનિષ બારોટે તેમના વોટ્સએપ સ્ટેટસમાં 76માં ગણતંત્ર દિવસના બદલે સ્વતંત્રતા દિવસની શુભેચ્છા પાછવીને ભાંગરો વાટ્યો હતો.

મનિષ બારોટના વોટ્સએપ સ્ટેટસનો સ્ક્રીન શોટ સોશિયલ મીડિયામાં વાયરલ થયો છે. જેના કારણે શહેરીજનોમાં શિક્ષણ સમિતિના ચેરમેનના શિક્ષણ અંગે સવાલ ઉઠ્યા હતા. બની બેઠેલા નેતાઓના શિક્ષણના સ્તરનો નમૂનો આ કિસ્સા પરથી જોવા મળ્યો છે. 

વોર્ડ નં.6 નાં ભાજપના નગરસેવક મનિષ બારોટ હાલમાં વિસનગર નગરપાલિકાની શિક્ષણ સમિતિના ચેરમેન છે. વોર્ડ નં.6 નાં મતદારોએ ચૂંટણીમાં સારા મતદાનથી ચૂંટી કાઢતાં શાસક પક્ષે શિક્ષણ સમિતિના ચેરમેનનું પદ આપ્યું છે.

શિક્ષણ સમિતિના ચેરમેન મનિષ બારોટનું જનરલ નોલેજ અને ખુદનું શિક્ષણ સ્તર કેટલું છે તે અંગે શહેરીજનોને જાણ થઈ ગઈ છે. ગણતંત્ર દિવસના દિવસે શિક્ષણ સમિતિના ચેરમેને પોતાના વોટ્સએપ સ્ટેટસમાં પ્રજાસત્તાક દિવસના બદલે 'સ્વતંત્રતા દિવસ'ની શુભેચ્છા આપી દીધી હતી. આ સ્ટેટસનો સ્ક્રીન શોટ સોશિયલ મીડિયામાં વાયરલ થતાં શહેરની શાણી પ્રજાએ શિક્ષણ સમિતિના ચેરમેનનું શિક્ષણ સ્તર  પારખી લીધું છે.