અમદાવાદના ઘાટલોડિયા વિસ્તારમાં આવેલી જાણીતી ત્રિપદા ઇન્ટરનેશનલ સ્કૂલમાં શિક્ષક દ્વારા વિદ્યાર્થીને માર મારવાની ઘટના સામે આવી છે. ધોરણ 9માં અભ્યાસ કરતા એક વિદ્યાર્થી સાથે થયેલા આ દુર્વ્યવહારને પગલે વાલીઓમાં ભારે રોષ જોવા મળી રહ્યો છે.
શું હતી સમગ્ર ઘટના? 
મળતી માહિતી મુજબ, વર્ગખંડમાં અભ્યાસ દરમિયાન એક વિદ્યાર્થી પાસે રહેલા વ્હાઈટનરમાંથી અવાજ આવી રહ્યો હતો. આ નજીવી બાબતે અંગ્રેજી વિષયના શિક્ષક નિશાનંદ પાત્રા પોતાનો સંયમ ગુમાવી બેઠા હતા. તેમણે ઉશ્કેરાઈને તમામ વિદ્યાર્થીઓની હાજરીમાં જ તે વિદ્યાર્થીને ત્રણ જોરદાર લાફા મારી દીધા હતા. શિક્ષકના આ હિંસક વર્તનથી વિદ્યાર્થી ડઘાઈ ગયો હતો.
વાલીઓનો વિરોધ અને સીસીટીવી ફૂટેજ :&nbsp;
વિદ્યાર્થીએ ઘરે જઈને આપવીતી જણાવતા રોષે ભરાયેલા વાલીઓ તાત્કાલિક શાળાએ પહોંચ્યા હતા. વાલીઓએ આચાર્યની ચેમ્બરમાં હોબાળો મચાવ્યો હતો અને શિક્ષક વિરુદ્ધ કડક પગલાં લેવાની માંગ કરી હતી. મામલો ગરમાતા શાળા સંચાલકોએ ક્લાસરૂમના સીસીટીવી ફૂટેજ ચેક કર્યા હતા. ફૂટેજમાં શિક્ષક વિદ્યાર્થીને માર મારતા સ્પષ્ટ દેખાતા સત્ય બહાર આવ્યું હતું.
શાળા સંચાલકોની કાર્યવાહી :&nbsp;
વિદ્યાર્થી સાથે શારીરિક હિંસાની ઘટનાને શાળા મેનેજમેન્ટે ગંભીર ગણી છે. શિક્ષણ કાર્યમાં શિસ્તના નામે થતી આવી હિંસાને અસ્વીકાર્ય ગણીને અંગ્રેજીના શિક્ષક નિશાનંદ પાત્રાને તાત્કાલિક અસરથી નોકરીમાંથી સસ્પેન્ડ કરી દેવામાં આવ્યા છે. શાળાના આચાર્યે વિશ્વાસ અપાવ્યો છે કે ભવિષ્યમાં આવી ઘટનાઓનું પુનરાવર્તન થશે નહીં. હાલ આ મુદ્દો સોશિયલ મીડિયા અને વાલી મંડળોમાં ચર્ચાનું કેન્દ્ર બન્યો છે.

ત્રિપદા સ્કૂલ શિક્ષક વિવાદ

ઈટનરના અવાજ બાબતે ઉશ્કેરાયેલા શિક્ષકે ધોરણ 9ના વિદ્યાર્થીને માર્યો, શાળાએ કર્યા સસ્પેન્ડ

December 31, 2025 | 02:10 IST