સુરત શહેરના હજીરા વિસ્તારમાં આવેલા મોરા ગામમાં એક અત્યંત ભયાનક અકસ્માતની ઘટના પ્રકાશમાં આવી છે. ગત 22 ફેબ્રુઆરીના રોજ ગામના મુખ્ય પંચાયત રોડ પરથી પસાર થઈ રહેલા એક નિર્દોષ યુવકને પાછળથી પૂરઝડપે આવતી એક ઈકો કારે જોરદાર ટક્કર મારી હતી. આ સમગ્ર ઘટના નજીકમાં લાગેલા સીસીટીવી કેમેરામાં કેદ થઈ છે, જેના ફૂટેજ જોઈને કોઈપણ વ્યક્તિ ધ્રૂજી ઉઠે તેમ છે.
ચમત્કારિક બચાવ અને રુંવાડા ઉભા કરી દે તેવા દ્રશ્યો :&nbsp;
સીસીટીવી ફૂટેજમાં સ્પષ્ટ દેખાય છે કે એક યુવક રોડની સાઈડમાં શાંતિથી ચાલી રહ્યો હતો. આ દરમિયાન પાછળથી એક ઘેરા રંગની ઈકો કાર અત્યંત સ્પીડમાં ધસી આવે છે અને યુવકને જોરદાર ટક્કર મારે છે. ટક્કર લાગતાની સાથે જ યુવક હવામાં ફંગોળાઈને જમીન પર પટકાયો હતો. આ અકસ્માત એટલો ગંભીર હતો કે યુવકનું માથું કારના વ્હીલ નીચે આવતા-આવતા બચ્યું હતું. જો યુવક સેજ પણ આઘો-પાછો થયો હોત તો મોટી જાનહાનિ થઈ શકી હોત. દુર્ઘટના સર્જાયા બાદ માનવતા બતાવવાને બદલે કારચાલક વધુ સ્પીડમાં વાહન હંકારી ત્યાંથી નાસી છૂટ્યો હતો.
શોર્ટકટના ચક્કરમાં ગ્રામજનોનો જીવ જોખમમાં :&nbsp;
સ્થાનિકોના જણાવ્યા અનુસાર, આ વિસ્તારમાં ખાનગી નંબર પ્લેટ ધરાવતી ઈકો કારો મોટાભાગે ગેરકાયદેસર રીતે પેસેન્જર ભરવાનું કામ કરે છે. હાઈવે પર પોલીસના ડરથી બચવા માટે આ ચાલકો ગામના સાંકડા પંચાયત રોડને શોર્ટકટ તરીકે વાપરે છે. રહેણાંક વિસ્તાર હોવા છતાં આ વાહનચાલકો સ્પીડ મર્યાદાનું પાલન કરતા નથી. ખાસ કરીને સવાર અને સાંજની પીક અવર્સ દરમિયાન જ્યારે બાળકો અને મહિલાઓની અવરજવર વધુ હોય છે, ત્યારે આ રસ્તાઓ 'ડેન્જર ઝોન' બની જાય છે.
તંત્રની ઉદાસીનતા અને ગ્રામજનોનો રોષ :&nbsp;
મોરા ગામના આગેવાનો અને પંચાયત બોડીએ અગાઉ પણ આ સમસ્યા અંગે અનેક રજૂઆતો કરી છે. પંચાયતના સભ્યોએ રસ્તા પર ઉતરીને આવા પેસેન્જર વાહનોને રોકવાનો અને સમજાવવાનો પ્રયાસ કર્યો હતો, પરંતુ કારચાલકોની મનમાની યથાવત રહી છે. પોલીસ પેટ્રોલિંગના અભાવે અને ટ્રાફિકના નિયમોના સરેઆમ ઉલ્લંઘનને કારણે હવે ગ્રામજનોમાં ભારે ફફડાટ અને રોષ જોવા મળી રહ્યો છે.
દોષિત ચાલક સામે કાર્યવાહીની માંગ :&nbsp;
હાલમાં આ અકસ્માતના સીસીટીવી ફૂટેજ સોશિયલ મીડિયા પર વાયરલ થઈ રહ્યા છે. સ્થાનિકોની માંગ છે કે પોલીસ ફૂટેજના આધારે ઈકો કારના નંબર મેળવી ફરાર ચાલકની ધરપકડ કરે. જો તાત્કાલિક અસરથી આ બેફામ વાહનો પર લગામ નહીં કસવામાં આવે, તો ભવિષ્યમાં કોઈ મોટી હોનારત સર્જાઈ શકે છે તેવી ભીતિ ગ્રામજનો વ્યક્ત કરી રહ્યા છે.

હજીરા અકસ્માત સમાચાર

મોરા ગામમાં પૂરઝડપે આવતી કારે રાહદારીને હવામાં ઉછાળ્યો; ચમત્કારિક બચાવ છતાં ચાલક ફરાર

February 24, 2026 | 18:18 IST