સુરતના અમરોલીમાં ચાલુ સિટી બસમાં ભીષણ આગ

ડાયમંડ સિટી સુરતમાં જાહેર પરિવહન સેવા સમાન સિટી બસમાં આગ લાગવાની એક ભયાનક ઘટના સામે આવી છે. 2 જાન્યુઆરીના રોજ શહેરના અમરોલી વિસ્તારમાં એક ચાલુ સિટી બસમાં આગ ફાટી નીકળતા સમગ્ર વિસ્તારમાં અફરા-તફરીનો માહોલ સર્જાયો હતો. આ ઘટના સમયે બસમાં 15થી વધુ મુસાફરો સવાર હતા, જેમના જીવ જોખમમાં મુકાયા હતા. જોકે, ડ્રાઈવરની સતર્કતા અને સમયસૂચકતાને કારણે એક મોટી હોનારત ટળી છે અને તમામ મુસાફરો સુરક્ષિત રીતે બહાર નીકળી શક્યા છે.

મુસાફરોને બહાર નીકળવાનો પૂરતો સમય મળ્યો

ઘટનાની વિગતો મુજબ, જ્યારે સિટી બસ અમરોલી વિસ્તારમાંથી પસાર થઈ રહી હતી ત્યારે અચાનક એન્જિનના ભાગમાંથી ધુમાડા નીકળવાનું શરૂ થયું હતું. બસના ડ્રાઈવરે તરત જ જોખમ પારખી લીધું અને સમય બગાડ્યા વિના બસને રોડની બાજુમાં ઉભી રાખી દીધી હતી. જોતજોતામાં આ ધુમાડો ભીષણ આગમાં ફેરવાઈ ગયો હતો અને જોતજોતામાં આખી સિટી બસમાં આગ પ્રસરી ગઈ હતી. ડ્રાઈવરની આ ત્વરિત કાર્યવાહીને કારણે મુસાફરોને બહાર નીકળવાનો પૂરતો સમય મળી ગયો હતો.

આ પણ વાંચો: સ્વિટ્ઝરલેન્ડમાં બાર અગ્નિકાંડમાં મૃત્યુઆંક વધ્યો

ગણતરીની મિનિટોમાં જ બસ બળીને ખાખ થઈ ગઈ

બસમાં આગ લાગતા જ મુસાફરોમાં ભારે ચીસાચીસ અને નાસભાગ મચી ગઈ હતી. પોતાનો જીવ બચાવવા માટે મુસાફરો બસમાંથી નીચે કૂદી પડ્યા હતા. સદનસીબે, આ દુર્ઘટનામાં કોઈ પણ મુસાફરને ઈજા પહોંચી નથી અને તમામ 15 મુસાફરોનો ચમત્કારિક બચાવ થયો છે. જોકે, આગ એટલી વિકરાળ હતી કે, ગણતરીની મિનિટોમાં જ આખી બસ બળીને ખાખ થઈ ગઈ હતી.

ફાયર વિભાગનો કાફલો તાત્કાલિક ઘટનાસ્થળે પહોંચ્યો

આ ઘટનાની જાણ થતા જ સુરત ફાયર વિભાગનો કાફલો તાત્કાલિક ઘટનાસ્થળે પહોંચી ગયો હતો. ફાયર ફાઈટરોએ સતત પાણીનો મારો ચલાવીને ભારે જહેમત બાદ સિટી બસમાં આગ પર કાબૂ મેળવ્યો હતો. પ્રાથમિક તપાસમાં આ આગ શોર્ટ સર્કિટના કારણે લાગી હોવાનું અનુમાન વ્યક્ત કરવામાં આવી રહ્યું છે. સ્થાનિક તંત્ર દ્વારા હવે બસની જાળવણી અને સુરક્ષાના માપદંડો અંગે તપાસ હાથ ધરવામાં આવે તેવી શક્યતા છે.