Surat : જન્મદિવસના દિવસે જ 16 વર્ષીય વિદ્યાર્થીનો આપઘાત, પોલીસે તપાસ હાથ ધરી...

સુરતમાં એક અત્યંત હૃદયદ્રાવક અને ચોંકાવનારી ઘટના સામે આવી છે, જ્યાં ભેસ્તાન વિજય લક્ષ્મી નગરમાં માત્ર 16 વર્ષીય વિદ્યાર્થી આસુતોષે પોતાના જન્મદિવસના દિવસે જ જીવન ટુંકાવ્યું છે. આ ઘટનાથી સમગ્ર વિસ્તારમાં શોકનું મોજુ ફરી વળ્યું છે, અને પરિવારજનો પર જાણે આભ તૂટી પડ્યું છે.

પિતા કેક લઈને આવ્યા, પુત્રને ફાંસો ખાધેલો જોયો...

આસુતોષ ધોરણ 9 માં અભ્યાસ કરતો હતો. આજે તેનો જન્મદિવસ હતો, અને તેના પિતા પુત્રનો જન્મદિવસ ઉજવવા માટે ઉત્સાહભેર કેક લઈને ઘરે આવ્યા હતા. પરંતુ, ઘરે આવતા જ તેમને જે દૃશ્ય જોવા મળ્યું તે કોઈ પણ પિતા માટે કલ્પનાતીત હતું. તેમણે પોતાના પુત્ર આસુતોષને ઘરમાં ફાંસો ખાધેલી હાલતમાં જોયો. આ દૃશ્ય જોઈને પિતા શોકમાં ગરકાવ થઈ ગયા અને તેમની બૂમાબૂમ સાંભળીને આસપાસના સ્થાનિકો દોડી આવ્યા હતા.

આપઘાત પાછળનું કારણ અકબંધ...

ઘટનાની જાણ થતા જ ડીંડોલી પોલીસ તાત્કાલિક ઘટનાસ્થળે પહોંચી હતી. પોલીસે આસુતોષના મૃતદેહને પોસ્ટમોર્ટમ માટે મોકલી આપીને કાયદેસરની કાર્યવાહી શરૂ કરી છે. જોકે, આટલી નાની ઉંમરે અને જન્મદિવસ જેવા ખુશીના દિવસે જ આસુતોષે શા માટે આવું આત્યંતિક પગલું ભર્યું? તે પાછળનું સાચું કારણ હજુ સુધી અકબંધ છે. પોલીસની ઊંડાણપૂર્વકની તપાસ બાદ જ આત્મહત્યા પાછળના રહસ્ય પરથી પડદો ઊંચકાશે.

આ પણ વાંચો : સુરતમાં નાઈટ ડ્યૂટી પર જતા યુવકના માથા પર લક્ઝરીનું ટાયર ફરી વળ્યું, ઘટનાસ્થળે જ મૃત્યુ

બાળકોમાં વધતા તણાવ અને માનસિક સ્વાસ્થ્ય પર ચિંતા...

આવી ઘટનાઓ વારંવાર સામે આવતા બાળકો અને કિશોરોમાં વધતા તણાવ અને માનસિક સ્વાસ્થ્યના મુદ્દા પર ગંભીર ચિંતા વ્યક્ત થઈ રહી છે. શિક્ષણનું દબાણ, સામાજિક કારણો, પારિવારિક સમસ્યાઓ કે અન્ય કોઈ બાબત આ પ્રકારના આત્યંતિક પગલાં ભરવા માટે જવાબદાર હોઈ શકે છે. વાલીઓ અને શાળાઓએ બાળકોના માનસિક સ્વાસ્થ્ય પર ધ્યાન આપવું અને તેમને યોગ્ય માર્ગદર્શન પૂરું પાડવું અત્યંત જરૂરી છે. સુરતમાં બનેલી આ ઘટના સમાજ માટે એક લાલબત્તી સમાન છે. આશા છે કે, પોલીસ તપાસ બાદ આસુતોષના આપઘાત પાછળનું સાચું કારણ બહાર આવશે, અને આવા બનાવો ફરી ન બને તે માટે સમાજ અને તંત્ર દ્વારા સંયુક્ત પ્રયાસો હાથ ધરાશે.

આ પણ વાંચો : છેલ્લા 24 કલાકમાં 101 તાલુકાઓમાં મેઘરાજાએ કરી મહેર, આ જિલ્લાઓમાં એલર્ટ જાહેર