રેલવે નવું ટાઈમ ટેબલ: 85 ટ્રેનો ઝડપી દોડશે

પશ્ચિમ રેલવેના અમદાવાદ ડિવિઝન દ્વારા નવા વર્ષના પ્રારંભે મુસાફરો માટે મોટી જાહેરાત કરવામાં આવી છે. 1 જાન્યુઆરી, 2026થી સમગ્ર ડિવિઝનમાં ટ્રેનોનું નવું સમયપત્રક અમલમાં મૂકવામાં આવ્યું છે. રેલવેના આ નિર્ણયથી ટ્રેનોની ગતિ વધશે અને મુસાફરો પોતાના ગંતવ્ય સ્થાને વહેલા પહોંચી શકશે

85 ટ્રેનોની સ્પીડ વધી, સમયમાં મોટો ઘટાડો : 

રેલવે તંત્ર દ્વારા લેવાયેલા ટેકનિકલ નિર્ણય મુજબ, અમદાવાદ ડિવિઝનમાંથી પસાર થતી 85 ટ્રેનોની ગતિમાં વધારો કરવામાં આવ્યો છે. આ સુધારાના કારણે 23 જેટલી ટ્રેનોના મુસાફરી સમયમાં 5 મિનિટથી લઈને 40 મિનિટ સુધીનો ઘટાડો થયો છે. આ ફેરફાર લાંબા અંતરના મુસાફરો માટે ખૂબ જ ફાયદાકારક સાબિત થશે

ટ્રેનોના આગમન-પ્રસ્થાનમાં ફેરફાર નવા ટાઈમ ટેબલ મુજબ ટ્રેનોના સમયમાં બે પ્રકારે ફેરફાર થયા છે:

વહેલી પહોંચનારી ટ્રેનો: ડિવિઝનના વિવિધ સ્ટેશનો પર 110 ટ્રેનો હવે નિર્ધારિત સમય કરતાં 5 થી 40 મિનિટ વહેલી પહોંચશે

મોડી પહોંચનારી ટ્રેનો: 57 ટ્રેનોના સમયમાં ફેરફાર કરીને તેને પોસ્ટપોન કરવામાં આવી છે, જે અગાઉના સમય કરતાં 5 થી 45 મિનિટ મોડી આવશે

આ મુખ્ય સ્ટેશનો પર સમય બદલાયો : 

આ નવા ફેરફારની અસર અમદાવાદ (કાલુપુર), સાબરમતી, મહેસાણા, પાલનપુર, ગાંધીનગર, ભુજ, ગાંધીધામ, હિંમતનગર, પાટણ, વિરમગામ અને ધ્રાંગધ્રા સહિતના તમામ નાના-મોટા સ્ટેશનો પર જોવા મળશે. મુસાફરોએ હવે પ્લેટફોર્મ પર જતા પહેલા પોતાની ટ્રેનનો ચોક્કસ સમય જાણી લેવો અનિવાર્ય છે.

મુસાફરો માટે ખાસ સૂચના : 

રેલવે વિભાગે મુસાફરોને અપીલ કરી છે કે રેલવે સ્ટેશને પહોંચતા પહેલા સત્તાવાર વેબસાઇટ અથવા પૂછપરછ બારી પરથી ટ્રેનનો નવો સમય ચકાસી લેવો. આ ફેરફાર આજથી જ લાગુ થઈ ગયો હોવાથી મુસાફરીના આયોજનમાં સાવચેતી રાખવી જરૂરી છે.