Rajkot : હળદરની ખેતીની લાલચ ભારે પડી, વેપારી સાથે કરોડોની ઠગાઈ

રાજકોટના એક વેપારી સાથે રૂ. 64.80 કરોડની છેતરપિંડીનો બનાવ સામે આવ્યો છે. ધર્મ ભક્તિ પ્રાઇવેટ લિમિટેડ નામે ખેત ઉત્પાદનોની કંપની ધરાવતા ફરિયાદી પ્રશાંત કાનાબારને મુંબઈની એ.એસ.એગ્રી એન્ડ એકવા કંપનીના નામે કેટલાક આરોપીઓએ વિશ્વાસમાં લીધા હતા. આ ઠગ ટોળકીએ ફરિયાદીને હળદરની ખેતી માટે પોલી હાઉસ બનાવવા અને તેના દ્વારા રૂ. 1 અબજ અને 94 લાખની જંગી કમાણી કરાવવાની લાલચ આપી હતી. તેમની વાતોમાં આવી ગયેલા પ્રશાંત કાનાબાર અને તેમના ભાગીદારને આરોપીઓએ ધીરે ધીરે ઝાંસામાં લીધા.

વર્ષ 2021 માં આરોપીઓએ ફરિયાદી પાસેથી અલગ અલગ ત્રણ બેંક ખાતામાં કુલ રૂ. 64.80 કરોડની માતબર રકમ પડાવી લીધી હતી. આ રૂપિયા લીધા બાદ મુંબઈના આ શખ્સોએ 2025 સુધી ફરિયાદીને કોઈ વળતર કે નાણાં પરત કર્યા ન હતા.

લાંબા સમય સુધી રાહ જોયા બાદ આખરે રાજકોટના વેપારી પ્રશાંત કાનાબારને ખ્યાલ આવ્યો કે તેઓ છેતરપિંડીનો ભોગ બન્યા છે. પોતાની સાથે થયેલી આ વિશાળ છેતરપિંડી અંગે તેમણે રાજકોટ ક્રાઇમ બ્રાન્ચમાં કુલ 19 જેટલા શખ્સો વિરુદ્ધ ફરિયાદ નોંધાવી છે. પોલીસે આ મામલે તપાસ હાથ ધરી છે અને આરોપીઓની શોધખોળ શરૂ કરી છે. આ ઘટના રાજકોટના વેપારી વર્તુળમાં ચર્ચાનો વિષય બની છે.