Surat : પીવાનું પાણી બન્યું ઝેરી! પાણી પીધા બાદ 50 થી વધુ રત્નકલાકારો થયા બીમાર

સુરત શહેરના કાપોદ્રા વિસ્તારમાં આવેલા અનભ જેમ્સ કંપનીમાં આજે ચકચારભર્યો બનાવ સામે આવ્યો છે. માહિતી મુજબ, કંપનીમાં કામ કરતા 50 થી વધુ રત્નકલાકારો પાણી પીધા બાદ અચાનક બીમાર પડી ગયા હતા.

પ્રાથમિક તારણ મુજબ એવું માનવામાં આવી રહ્યું છે કે, પીવાના પાણીમાં અનાજમાં નાખવામાં આવતી ઝેરી દવા મેળવાઈ ગઈ હતી.કંપનીના પાણીના ફિલ્ટરમાં આ દવા કેવી રીતે ભેળાઈ ગઈ, એ અંગે હજુ સ્પષ્ટ માહિતી સામે આવી નથી.

બીમાર પડેલા તમામ કામદારોને તાત્કાલિક નજીકની હોસ્પિટલમાં ખસેડી દેવામાં આવ્યા છે, જ્યાં તેમની સારવાર ચાલી રહી છે. કંપનીના કામદારોને વોમિટિંગ, ચક્કર આવવા અને બેભાન થવાના લક્ષણો જણાયા હતા.

સ્થાનિક પોલીસે ઘટના સ્થળે પહોંચીને તપાસ હાથ ધરી છે અને પાણીના નમૂનાઓ ફોરેન્સિક તપાસ માટે મોકલવામાં આવ્યા છે. હજુ સુધી આ પગલાં પાછળ કોઈની દુર્ભાવનાપૂર્વકની હરકત હતી કે નહીં તે અંગે પોલીસ તપાસના પરિણામ બાદ સ્પષ્ટતા થશે. આ ઘટનાએ સુરતના ઉદ્યોગ ક્ષેત્રમાં ભય અને ચિંતા ફેલાવી છે.