Navsari : હનુમાન જયંતીના મહાપ્રસાદથી ફૂડ પોઈઝનિંગ, આરોગ્ય વિભાગ દોડતું થયું

ગુજરાતના નવસારી જિલ્લાના મટવાડા અને સામાપોર ગામમાં હનુમાન જયંતિના દિવસે વહેંચવામાં આવેલા પ્રસાદને લીધે 100 થી વધુ લોકોને ફૂડ પોઇઝનિંગની અસર જોવા મળી હતી. આ ઘટનામાં ઝાડા, ઉલટી અને માથાના દુખાવાની ફરિયાદ નોંધાઈ હતી. જો કે, સદનસીબે કોઈને ગંભીર અસર થઈ ન હતી અને સારવાર બાદ તમામ લોકોને હોસ્પિટલમાંથી રજા આપી દેવામાં આવી છે.

ઘટનાની વિગતવાર માહિતી અનુસાર, સામાપોર અને મટવાડા ગામના લોકોએ સાથે મળીને હનુમાન જયંતિ નિમિત્તે ભંડારાનું આયોજન કર્યું હતું. બજરંગબલીના દર્શન કર્યા બાદ મોટી સંખ્યામાં લોકોએ મહાપ્રસાદનો લાભ લીધો હતો. પરંતુ, શનિવાર (12 એપ્રિલ)ની મોડી રાતથી અચાનક 100 થી વધુ લોકોને પેટમાં દુખાવો, ઉલટી અને ઝાડા જેવી તકલીફો થવા લાગી હતી. જેના કારણે આ તમામ લોકોને ફૂડ પોઇઝનિંગની અસર થઈ હોવાનું પ્રાથમિક તપાસમાં જાણવા મળ્યું હતું.

આ ઘટનાની જાણ થતાં જ ફૂડ વિભાગે તાત્કાલિક કાર્યવાહી હાથ ધરી છે. ભંડારામાં પ્રસાદ તરીકે પીરસવામાં આવેલી છાશ અને કેરીના રસ શંકાના દાયરામાં છે. ફૂડ વિભાગ દ્વારા આ બંને ખાદ્ય સામગ્રીના નમૂના (સેમ્પલ) લેવામાં આવ્યા છે અને તેને પરીક્ષણ માટે લેબોરેટરીમાં મોકલવામાં આવ્યા છે. ફૂડ સેમ્પલના રિપોર્ટ આવ્યા બાદ ફૂડ વિભાગ અને આરોગ્ય વિભાગ દ્વારા આગળની કાયદેસરની કાર્યવાહી કરવામાં આવશે.

ઉલ્લેખનીય છે કે, આ ફૂડ પોઇઝનિંગની ઘટનામાં સૌથી વધુ અસર બાળકોને થઈ હતી. જો કે, તુરંત જ તેમને તબીબી સારવાર આપવામાં આવતા તેમની તબિયત સુધારા પર છે અને હાલમાં તમામ બાળકો સુરક્ષિત છે. આરોગ્ય વિભાગની ટીમ પણ ઘટનાની માહિતી મળતાની સાથે જ તાત્કાલિક ઘટનાસ્થળે પહોંચી ગઈ હતી અને જરૂરી પગલાં લીધા હતા. હાલમાં ફૂડ વિભાગ રિપોર્ટની રાહ જોઈ રહ્યું છે, જેના આધારે આ ઘટના પાછળનું ચોક્કસ કારણ જાણી શકાશે.