મોરબી મહાનગરપાલિકાની ઘોર બેદરકારી, પ્રજાના પૈસાનો પથ્થર કર્યો

સામાન્ય રીતે આપણે એવી કહેવત સાંભળી છે કે પૈસાનું પાણી થઇ ગયું પણ મોરબીમાં એક ચોંકાવનારો કિસ્સો બહાર આવ્યો છે કે મોરબીમાં પ્રજાના પૈસાનું પાણી નહીં પણ પથ્થર થઇ ગયા છે. 

મોરબી મહાનગરપાલિકા કંઇ પણ કરી શકે છે તેનો આ બોલતો પુરાવો મળ્યો છે. મોરબી મહાનગરપાલિકાએ પ્રજાના પૈસાનો પથ્થર કરી નાખ્યો છે. આવું અમે એટલા માટે કહી રહ્યા છીએ કે મહાનગરપાલિકાના ગાર્ડનમાં છેલ્લા 5 વર્ષથી પડી રહેલી સિમેન્ટની થેલીઓ મળી આવી છે અને આ થેલીઓમાં રહેલો સિમેન્ટ પથ્થર ગઇ ગયો છે.

મહાનગરપાલિકાના અધિકારીઓની ઘોર બેદરકારી આ બનાવમાં બહાર આવી છે. જરૂરિયાત કરતા વધુ સિમેન્ટની થેલીઓ ખરીદાઇ હોઇ શકે છે અથવા તો જે કામ માટે સિમેન્ટ લવાયો હતો તે કામ જ થયું નથી તેવું લાગી રહ્યું છે. 

મહાનગરપાલિકાના ગાર્ડનમાં જ સિમેન્ટની 400 થેલીઓ પડેલી છે. આ જથ્થો અગાઉ લીલાપર આવાસ યોજના માં પડ્યો હતો પણ હવે તેને ત્યાંથી ખસેડીને કોર્પોરેશનના ગાર્ડનમાં મુકવામાં આવ્યો છે. મળેલી જાણકારી મુજબ 2020માં જનભાગીદારીમાંથી રસ્તો બનાવવા માટે આ સિમેન્ટનો જથ્થો મંગાવામાં આવ્યો હતો 

જો કે 2020માં ખરીદાયેલો સિમેન્ટનો જથ્થો અત્યાર સુધી વપરાયો કેમ નહીં તે સવાલ ઉઠી રહ્યો છે. સિમેન્ટની જરૂરિયાત ન હતી તો કેમ તેને ખરીદવામાં આવ્યો હતો તે સહિત ઘણા પ્રશ્નો આ વિવાદમાં ઉઠી રહ્યા છે. પ્રજાના પૈસાનું પાણી કરવામાં કોને રસ છે તે પ્રશ્ન પુછાઇ રહ્યો છે.