અરબી સમુદ્રના કિનારે બિરાજમાન પ્રથમ જ્યોતિર્લિંગ સોમનાથ મહાદેવના સાનિધ્યમાં આ વર્ષે મહાશિવરાત્રીનો પર્વ અત્યંત ભવ્ય રીતે ઉજવવામાં આવશે. સોમનાથ ટ્રસ્ટ અને ગીર સોમનાથ જિલ્લા વહીવટીતંત્રના અંદાજ મુજબ આ પર્વ દરમિયાન ૫ લાખથી વધુ શ્રદ્ધાળુઓ ઉમટી પડવાની શક્યતા છે. ભક્તોની ભારે ભીડને પહોંચી વળવા માટે વિશેષ સુરક્ષા અને સુવિધાઓનું આયોજન કરવામાં આવ્યું છે.
ભક્તો માટે મહત્વનો નિર્ણય: ૪૨ કલાક અવિરત દર્શન
શ્રદ્ધાળુઓને દર્શનમાં કોઈ અગવડતા ન પડે તે માટે સોમનાથ ટ્રસ્ટે નિર્ણય લીધો છે કે ૧૫ ફેબ્રુઆરી, ૨૦૨૬ના રોજ સવારે ૪:૦૦ વાગ્યે મંદિરના દરવાજા ખુલશે જે સતત ૪૨ કલાક સુધી એટલે કે ૧૬ ફેબ્રુઆરીની રાત સુધી ખુલ્લા રહેશે. આ નિર્ણયથી ભક્તો કોઈપણ સમયે દર્શનનો લ્હાવો લઈ શકશે અને ભીડનું વ્યવસ્થાપન પણ સરળ બનશે.
હાઈ-ટેક સુરક્ષા અને વહીવટી સજ્જતા :&nbsp;
ભક્તોની સુરક્ષા માટે પોલીસ તંત્ર દ્વારા કડક બંદોબસ્ત ગોઠવવામાં આવ્યો છે. પ્રવેશદ્વાર પર સિક્યુરિટી ગેટની સંખ્યા ૬ થી વધારીને ૧૦ કરવામાં આવી છે. ૫૦૦થી વધુ પોલીસ જવાનો અને ઉચ્ચ અધિકારીઓ સતત દેખરેખ રાખશે. આ ઉપરાંત, ભક્તોની અવરજવર માટે વન-વે (એક માર્ગીય) વ્યવસ્થા અમલી બનાવવામાં આવી છે. કોઈપણ ઇમરજન્સીને પહોંચી વળવા માટે ૨૪ કલાક મેડિકલ ટીમ અને એમ્બ્યુલન્સ તૈનાત રહેશે.
સોમનાથ મહોત્સવ અને સાંસ્કૃતિક કાર્યક્રમો :&nbsp;
મહાશિવરાત્રી નિમિત્તે ૧૪ થી ૧૬ ફેબ્રુઆરી દરમિયાન ત્રિ-દિવસીય સોમનાથ મહોત્સવનું આયોજન કરાયું છે. આ મહોત્સવમાં ખ્યાતનામ ગાયક કૈલાશ ખેર સહિતના કલાકારો પોતાની પ્રસ્તુતિ આપશે. મંદિર પરિસરમાં આધુનિક લાઈટ એન્ડ સાઉન્ડ શો દ્વારા ભગવાન શિવના મહિમાનું વર્ણન કરવામાં આવશે.
વિશેષ ધાર્મિક વિધિઓ :&nbsp;
ચાર પ્રહરની પૂજા: શિવરાત્રીની પવિત્ર રાત્રિએ મહાદેવની વિશેષ ચાર પ્રહરની પૂજા, મહાભિષેક અને મહાઆરતી કરવામાં આવશે.
પાલખી યાત્રા: પરંપરાગત રીતે સોમનાથ દાદાની ભવ્ય પાલખી યાત્રા નગરભ્રમણ કરશે, જેમાં હજારો ભક્તો જોડાશે.

સોમનાથ મહાશિવરાત્રી

સોમનાથમાં મહાશિવરાત્રી પર ૫ લાખ ભક્તો ઉમટશે; કૈલાશ ખેરના સૂરોથી ગુંજશે શિવ ભક્તિનો મહોત્સવ

February 13, 2026 | 15:15 IST