અમદાવાદના જુહાપુરા વિસ્તારમાં શનિવારે વહેલી સવારે એક કાળજું કંપાવી દે તેવી દુર્ઘટના સર્જાઈ છે. પૂરઝડપે આવતા એક ડમ્પરે ૨૨ વર્ષીય યુવકને અડફેટે લેતા તેનું ઘટનાસ્થળે જ કમકમાટીભર્યું મોત નીપજ્યું હતું. આ ઘટનાને પગલે સમગ્ર વિસ્તારમાં અરેરાટી વ્યાપી ગઈ છે અને સ્થાનિકોમાં પોલીસ પ્રશાસન સામે ઉગ્ર રોષ જોવા મળી રહ્યો છે.
ઘટનાની વિગતો :&nbsp;
ફતેવાડી વિસ્તારમાં રહેતો મુસ્તકીમ નામનો યુવક સવારે સાતેક વાગ્યાના અરસામાં પોતાનું મોપેડ લઈને જુહાપુરા રોડ પર આવેલા રોયલ અકબર ટાવર પાસેથી પસાર થઈ રહ્યો હતો. આ દરમિયાન પાછળથી પૂરપાટ ઝડપે આવી રહેલા એક ડમ્પરે તેને જોરદાર ટક્કર મારી હતી. અકસ્માત એટલો ભયાનક હતો કે મુસ્તકીમને માથાના ભાગે ગંભીર ઈજાઓ પહોંચી હતી અને તેને સારવાર મળે તે પહેલા જ તેણે દમ તોડી દીધો હતો.
નંબર પ્લેટ વગરનું ડમ્પર અને સુરક્ષા પર સવાલ :&nbsp;
ચોંકાવનારી બાબત એ છે કે અકસ્માત સર્જનાર ડમ્પર પર આગળ કે પાછળ કોઈ પણ પ્રકારની નંબર પ્લેટ નહોતી. જુહાપુરા જેવા ગીચ વસ્તી ધરાવતા વિસ્તારમાં દિવસ દરમિયાન ભારે વાહનોના પ્રવેશ પર પ્રતિબંધ હોવા છતાં, આવા વાહનો કેવી રીતે શહેરમાં પ્રવેશે છે તે અંગે ગંભીર સવાલો ઉભા થયા છે. અગાઉ અનેકવાર રજૂઆતો કરવા છતાં તંત્ર દ્વારા કોઈ નક્કર પગલાં ન લેવાતા આજે એક નિર્દોષ યુવકે જીવ ગુમાવવો પડ્યો હોવાનો આક્ષેપ સ્થાનિકોએ કર્યો છે.
પોલીસ કાર્યવાહી અને તપાસ :&nbsp;
ઘટનાની જાણ થતા જ એમ-ડિવિઝન ટ્રાફિક પોલીસ અને સરખેજ પોલીસનો કાફલો સ્થળ પર દોડી ગયો હતો. પોલીસે મૃતદેહને પોસ્ટમોર્ટમ માટે હોસ્પિટલ ખસેડ્યો છે. પોલીસ અત્યારે સીસીટીવી ફૂટેજના આધારે ડમ્પર ચાલકની ઓળખ કરી તેને પકડવા માટે તજવીજ હાથ ધરી રહી છે. આ સાથે જ ડમ્પર પાસે શહેરમાં પ્રવેશવાની પરવાનગી હતી કે કેમ તે દિશામાં પણ તપાસ શરૂ કરવામાં આવી છે.

જુહાપુરા ડમ્પર અકસ્માત મોત

રોયલ અકબર ટાવર પાસે નંબર પ્લેટ વગરના ડમ્પરે એક્ટિવા સવાર મુસ્તકીમને કચડ્યો

February 21, 2026 | 12:00 IST