ઈરાન અને ઇઝરાયલ વચ્ચે વધતા જતા સૈન્ય તણાવ અને હવાઈ હુમલાઓને પગલે આંતરરાષ્ટ્રીય હવાઈ ક્ષેત્રમાં ભારે અનિશ્ચિતતા સર્જાઈ છે. આ પરિસ્થિતિને ધ્યાનમાં રાખીને અમદાવાદ એરપોર્ટ સત્તાધીશોએ મુસાફરોની સુરક્ષા અને સુવિધા માટે વિશેષ માર્ગદર્શિકા બહાર પાડી છે.
મુસાફરો માટે મુખ્ય સૂચનાઓ:
સ્ટેટસ ચેક કરો: એરપોર્ટ જતાં પહેલાં દરેક મુસાફરે પોતાની એરલાઇનની સત્તાવાર વેબસાઈટ, એપ અથવા હેલ્પલાઇન નંબર પરથી ફ્લાઈટનું વર્તમાન સ્ટેટસ ચોક્કસપણે તપાસી લેવું.
રૂટમાં ફેરફાર: યુદ્ધગ્રસ્ત વિસ્તારોની એરસ્પેસ બંધ થવાને કારણે ઘણી આંતરરાષ્ટ્રીય ફ્લાઈટ્સના રૂટ બદલવામાં આવ્યા છે, જેના લીધે મુસાફરીના સમયમાં વધારો અથવા ફ્લાઈટ મોડી થવાની શક્યતા છે.
સમયસર આગમન: સુરક્ષા તપાસ અને અન્ય ઓપરેશનલ પ્રક્રિયાઓમાં સમય લાગી શકે તેમ હોવાથી મુસાફરોને નિર્ધારિત સમય કરતાં વહેલા એરપોર્ટ પહોંચવા જણાવાયું છે.
બુકિંગમાં પ્રાથમિકતા: જે મુસાફરો પાસે અગાઉથી કન્ફર્મ બુકિંગ કે રજીસ્ટ્રેશન છે, તેમને ફ્લાઈટ ઓપરેશન દરમિયાન પ્રાથમિકતા આપવામાં આવશે.
વૈશ્વિક સ્થિતિની અસર:
ઈરાન દ્વારા કરવામાં આવેલા વળતા પ્રહાર બાદ ઘણા દેશોએ પોતાના એરપોર્ટ મર્યાદિત ગતિવિધિઓ માટે જ ખુલ્લા રાખ્યા છે અથવા તો સંપૂર્ણપણે બંધ કરી દીધા છે. અમદાવાદ એરપોર્ટના અધિકારીઓ સતત વૈશ્વિક એરપોર્ટ અને એરલાઇન્સના સંપર્કમાં છે. મુસાફરોને અનાવશ્યક અફવાઓથી દૂર રહી માત્ર સત્તાવાર સૂચનાઓનું પાલન કરવા અપીલ કરવામાં આવી છે.

અમદાવાદ એરપોર્ટ પર એલર્ટ

યુદ્ધના કારણે હવાઈ માર્ગો બદલાયા; અમદાવાદથી વિદેશ જતી ફ્લાઈટ્સ રદ કે મોડી થવાની શક્યતા

February 28, 2026 | 18:30 IST