અમરેલીના સાવરકુંડલામાં નાની બહેનના બદલે મોટી બહેન પરીક્ષા આપતા ઝડપાઈ

અમરેલી જિલ્લાના સાવરકુંડલામાં નાની બહેનના બદલે મોટી બહેન પરીક્ષા આપતા ઝડપાઈ ગઈ છે. ધોરણ-10ના પેપરમાં પરીક્ષા આપતી મોટી બહેનને ઝડપી લેવામાં આવી છે. નાની બહેનને ટાઈફોઈડ થયો હોવાથી મોટી બહેન પરીક્ષા આપવા આવી હતી. શનિવારે ગણિતના પેપર દરમિયાન ડમી વિદ્યાર્થીનિ પરીક્ષા આપતા ઝડપાયાની ઘટના બની હતી.

ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા 27 ફેબ્રુઆરીથી ધોરણ 10 અને 12 ની બોર્ડની પરીક્ષા શરૂ થઈ છે. ધોરણ 10 અને 12ની બોર્ડ પરીક્ષા અંતર્ગત શનિવારે ત્રીજા દિવસે રાજ્યમાં ગેરરીતિના 6 કેસ નોંધાયા હતા. જેમાં અમરેલીના સાવરકુંડલાની જે.વી.મોદી હાઇસ્કૂલમાં ડમી વિદ્યાર્થીનિ પરીક્ષા આપતા ઝડપાઇ હતી.  

સાવરકુંડલા પોલીસ સ્ટેશનમાં નોંધાયેલી ફરિયાદ અનુસાર જે.વી. મોદી હાઇસ્કૂલમાં ધોરણ 10ની બોર્ડની પરીક્ષા અંતર્ગત શનિવારે ગણિતના પેપરમાં ડમી વિદ્યાર્થીનિ ઝડપાઇ છે. ગણિતના પેપરમાં નાની બહેનના બદલે મોટી બહેન પરીક્ષા આપવા આવી હતી.

સુપરવાઇઝરને શંકા જતાં ડમી વિદ્યાર્થીનિનો ભાંડો ફૂટી ગયો હતો. પૂછપરછ કરતાં જાણવા મળ્યું હતું કે નાની બહનને ટાઇફોઈડ થયો હોવાથી મોટી બહેન પરીક્ષા આપવા આવી હતી. સુપરવાઈઝરે સાવરકુંડલા પોલીસ સ્ટેશનમાં બંને બહેનો સામે ફરિયાદ આપતા પોલીસે ગુનો નોંધીને વધુ તપાસ હાથ ધરી છે.