Gandhinagar : કમલમ નજીક નિર્માણાધીન બિલ્ડિંગની દિવાલ ધરાશાયી, 3 શ્રમિકો દટાયા, એકનું મોત

ગુજરાતમાં ચોમાસાના આગમન સાથે જ જૂની અને જર્જરિત ઇમારતો ધરાશાયી થવાનો સિલસિલો શરૂ થઈ ગયો છે, જે તંત્રના પ્રી-મોન્સૂન પ્લાન અને અમલવારી પર ગંભીર સવાલો ઊભા કરે છે. ગાંધીનગર (Gandhinagar)થી અમદાવાદ સુધી, એક પછી એક ઇમારત ધરાશાયી થવાની ઘટનાઓ અને ભયજનક મકાનોની યાદી ચિંતાજનક સ્થિતિ દર્શાવે છે.

કમલમ નજીક નિર્માણાધીન બિલ્ડિંગ ધરાશાયી, 1 શ્રમિકનું મોત...

પાટનગર ગાંધીનગર (Gandhinagar)માં ભાજપ કાર્યાલય કમલમ નજીક નિર્માણાધીન એક બિલ્ડિંગ ધરાશાયી થતાં હાહાકાર મચી ગયો છે. આ દુર્ઘટનામાં 1 શ્રમિકનું કરૂણ મોત નિપજ્યું છે, જ્યારે અન્ય કેટલાક લોકો ફસાયા હોવાની આશંકા છે. બાંધકામ હેઠળની ઇમારત ધસી પડવી એ કોન્ટ્રાક્ટર અને સંબંધિત સત્તાવાળાઓની ઘોર બેદરકારી સૂચવે છે. શું નિર્માણ કાર્યમાં ગુણવત્તાના ધોરણો જાળવવામાં આવ્યા હતા? આ પ્રશ્નનો જવાબ તપાસ બાદ જ મળશે.

ધર્મિ સોસાયટીમાં જર્જરિત ઇમારતનો ભાગ ધરાશાયી, 16 લોકોનો રેસ્ક્યુ

અમદાવાદમાં પણ શાહીબાગ વિસ્તારની ધર્મિ સોસાયટીમાં જર્જરિત ઇમારતનો એક ભાગ ધરાશાયી થતા ભારે ભયનો માહોલ સર્જાયો હતો. જોકે, ફાયર વિભાગની ત્વરિત કામગીરીને કારણે 16 લોકોને સલામત રીતે રેસ્ક્યુ કરી લેવામાં આવ્યા હતા, અને સદનસીબે કોઈ જાનહાનિ થઈ નથી. પરંતુ આ ઘટનાએ શહેરની જૂની ઇમારતોની દયનીય સ્થિતિ અને તેના જોખમ તરફ ધ્યાન દોર્યું છે.

રથયાત્રા રૂટ પર 513 ભયજનક મકાનો...

અમદાવાદમાં આગામી રથયાત્રા પૂર્વે તંત્ર દ્વારા રૂટ પરના ભયજનક મકાનોની યાદી જાહેર કરવામાં આવી છે. આ રૂટ પર 513 ભયજનક મકાનો આવેલા છે, જેમાંથી 190 મકાનોના પાણી અને ગટર જોડાણ કાપી નાખવામાં આવ્યા છે. આટલી મોટી સંખ્યામાં ભયજનક મકાનોનું અસ્તિત્વ દર્શાવે છે કે, તંત્ર દ્વારા ચોમાસા પહેલાં આવી ઇમારતો સામે કડક કાર્યવાહી કરવામાં આવી નથી, અને રથયાત્રા દરમિયાન આ ભયજનક મકાનો મોટી દુર્ઘટનાનું કારણ બની શકે છે.

આ પણ વાંચો : ₹3000 માં આખા વર્ષનો ટોલ ફ્રી, ગડકરીની FASTag પાસની ઐતિહાસિક જાહેરાત, 15 ઓગસ્ટથી અમલ!

TTPI કમિટી દ્વારા 1308 ભયજનક મકાનોને ચેતવણી નોટિસ...

શહેરની TTPI કમિટી દ્વારા કુલ 1308 ભયજનક મકાનોને ચેતવણી નોટિસ આપવામાં આવી છે. આ મકાનો પર ભીડ ન કરવા અને સાવચેત રહેવા માટે સૂચનાઓ પણ આપવામાં આવી છે. પરંતુ માત્ર નોટિસ આપવી પૂરતું નથી. આવા મકાનો સામે કડક પગલાં લઈને તેમને ડિમોલિશ કરવા કે મજબૂત કરવા અનિવાર્ય છે, જેથી નાગરિકોનો જીવ જોખમમાં ન મુકાય.

આ પણ વાંચો : Surat : પોલીસની નિષ્ક્રિયતા? આંગડિયા પેઢી પર 24 કલાકમાં બે લૂંટ, CCTV વાયરલ...

ગુજરાતમાં ચોમાસાની શરૂઆત સાથે જ ઇમારતો ધસી પડવાની ઘટનાઓ ચિંતાજનક છે. તંત્ર માત્ર નોટિસ આપવા કે રેસ્ક્યુ ઓપરેશન ચલાવવા પૂરતું સીમિત ન રહેતા, જૂની અને જર્જરિત ઇમારતો સામે કડક અને લાંબાગાળાના પગલાં ભરે તે અત્યંત આવશ્યક છે. નિર્માણાધીન બિલ્ડિંગની ગુણવત્તા અને જૂની ઇમારતોના સમારકામ કે ડિમોલિશન અંગેની નીતિનું કડકાઈથી પાલન થવું જોઈએ, જેથી ભવિષ્યમાં આવી ગોઝારી ઘટનાઓ ન બને અને નાગરિકો સુરક્ષિત રહી શકે.

આ પણ વાંચો : અમદાવાદ વિમાન દુર્ઘટના બાદ સુરત એરપોર્ટ નજીક નડતરરૂપ બિલ્ડિંગોનો સર્વે શરૂ