અમદાવાદ વિમાન દુર્ઘટના બાદ સુરત એરપોર્ટ નજીક નડતરરૂપ બિલ્ડિંગોનો સર્વે શરૂ

અમદાવાદમાં થયેલી વિમાન દુર્ઘટના પછી સુરત એરપોર્ટના ભવિષ્ય માટે મહત્વપૂર્ણ પગલાં ઉઠાવવામાં આવ્યા છે. સુરત એરપોર્ટની આજુબાજુમાં આવેલા નડતરરૂપ બિલ્ડિંગો અંગે વિવાદ ફરી ઊઠ્યો છે. એરપોર્ટ ઓથોરિટી દ્વારા NOC આપવામાં આવી હોવા છતાં પાલિકાએ BU પરમિશન આપી હતી.

હાલમાં 6 પૈકી 5 બિલ્ડિંગોનું સર્વે કાર્ય આરંભાઈ ગયું છે જેમાં ફ્લોરન્સ હાઉસિંગ, સાર્જન એપાર્ટમેન્ટ, ફ્લોઓના બિલ્ડિંગ, રવિ રત્નમ અને એલેન્ટી બિલ્ડિંગનો સમાવેશ થાય છે. જ્યારે ‘જસ્ટ રેસિડેન્સી’ બિલ્ડિંગનું સર્વે બાકી છે અને આગામી 2 દિવસમાં પૂરું કરવામાં આવશે. સર્વે બાદ નડતરરૂપ ભાગમાં માર્કિંગની કાર્યવાહી હાથ ધરાશે.

આ વિવાદ 2017-18થી ચાલે છે જ્યારે એરપોર્ટ માટે 27 બિલ્ડિંગ નડતરરૂપ ગણાવવામાં આવ્યા હતા. તેમાથી 21 કેસ કોર્ટમાં છે. પાલિકા તરફથી કહેવામાં આવ્યું કે, તેમણે માત્ર એરપોર્ટ ઓથોરિટીની NOC મળ્યા પછી જ પરમિશન આપી હતી. 7 બિલ્ડિંગના માલિકોએ કોર્ટમાં દાદ માંગી ન હતી અને તેમને નડતરરૂપ ઠરાવ્યા છે.

એરક્રાફ્ટ રૂલ્સ અનુસાર, ડિમોલીશન કલેક્ટરની જવાબદારી છે. જોકે, કલેક્ટર પાસે મેનપાવર કે મશીનરી ન હોવાના કારણે સુરત મહાનગર પાલિકાને સહકાર આપવાનો એફિડેવિટ આપવો પડ્યો હતો કે, જો કલેક્ટર ડિમોલીશન કરે તો પાલિકા જરૂરી સહાય આપશે.