ગુજરાતના પાટનગર ગાંધીનગરમાં સાયબર અપરાધીઓએ રોકાણના નામે વધુ એક નિર્દોષ નાગરિકને નિશાન બનાવ્યા છે. કુડાસણ વિસ્તારમાં રહેતા અને માણસામાં વ્યવસાય કરતા એક પ્રૌઢ વેપારીને શેરબજારમાં જંગી નફાની લાલચ આપીને ભેજાબાજોએ લાખો રૂપિયાની છેતરપિંડી આચરી છે. આ મામલે ગાંધીનગર રેન્જ સાયબર ક્રાઈમ પોલીસે ટેકનિકલ સર્વેલન્સના આધારે તપાસ શરૂ કરી છે.
ફેસબુક લિંક બની ફાંસો :&nbsp;
શૈલેષભાઈ મોદી નામના વેપારી પોતાની ફેક્ટરી પર હતા ત્યારે સોશિયલ મીડિયા પ્લેટફોર્મ ફેસબુક પર એક લિંક તેમની નજરે પડી હતી. આ જાહેરાતમાં પ્રતિષ્ઠિત સંસ્થા 'UTI AMC' ના માધ્યમથી શેરબજારનું માર્ગદર્શન આપવાની વાત કરવામાં આવી હતી. જિજ્ઞાસા વશ લિંક પર ક્લિક કરતા જ તેમને વોટ્સએપ પર એક ચોક્કસ ગ્રુપમાં ઉમેરવામાં આવ્યા હતા, જ્યાંથી છેતરપિંડીની જાળ બિછાવવાની શરૂઆત થઈ હતી.
નકલી એપ્લિકેશન અને ખોટા પ્રોફિટનો જાદુ :&nbsp;
સાયબર ગઠિયાઓએ વેપારીનો વિશ્વાસ જીતવા માટે ગ્રુપમાં અન્ય સભ્યોના નકલી નફાના સ્ક્રીનશોટ શેર કર્યા હતા. ત્યારબાદ, વેપારીને એક એવી મોબાઈલ એપ્લિકેશન ડાઉનલોડ કરાવવામાં આવી હતી જે અસલ UTI AMC ની એપ જેવી જ દેખાતી હતી. આ એપમાં વેપારીને પોતાનું પોર્ટફોલિયો દેખાતો હતો, જેમાં શેરની લે-વેચ અને વધતો જતો નફો દર્શાવવામાં આવતો હતો. આ આભાસી નફો જોઈને વેપારી લલચાઈ ગયા હતા.
કરોડોના ટ્રાન્ઝેક્શન અને ગઠિયાઓની ચાલ :&nbsp;
જૂન મહિનાથી જુલાઈ મહિનાના સમયગાળા દરમિયાન સાયબર માફિયાઓએ વેપારી પાસેથી અલગ-અલગ તબક્કે કુલ રૂ. 13.79 લાખ અલગ-અલગ બેંક ખાતાઓમાં જમા કરાવ્યા હતા. આ ખાતા સાહિલ એન્ટરપ્રાઈઝ અને યશ ટ્રેડર્સ જેવા બોગસ નામોથી સંચાલિત હતા. શરૂઆતમાં વિશ્વાસ જાળવી રાખવા માટે ગઠિયાઓએ વેપારીને ૧૦૦૦ રૂપિયા ઉપાડવાની પણ છૂટ આપી હતી, જેથી તેમને સિસ્ટમ અસલ હોવાનો ભરોસો બેસે.
પૈસા ઉપાડવા જતાં થયો પર્દાફાશ :&nbsp;
જ્યારે વેપારીએ પોતાનો નફો અને મૂળ રકમ પરત લેવાનો આગ્રહ કર્યો ત્યારે સાયબર ગેંગે અસલી રંગ બતાવ્યો હતો. તેમણે ટેક્સ ક્લિયરન્સ અને પ્રોસેસિંગ ફીના નામે બીજા લાખો રૂપિયાની માંગણી શરૂ કરી હતી. સતત પૈસાની માંગણી થતાં વેપારીને શંકા ગઈ અને તેમણે તપાસ કરતા માલૂમ પડ્યું કે તેમની સાથે મોટી છેતરપિંડી થઈ છે.
પોલીસ કાર્યવાહી અને સાવચેતી :&nbsp;
ભોગ બનનાર વેપારીએ તુરંત સાયબર હેલ્પલાઇન નંબર 1930 પર જાણ કરી હતી અને ત્યારબાદ ગાંધીનગર સાયબર ક્રાઈમ પોલીસ સ્ટેશનમાં ફરિયાદ નોંધાવી હતી. પોલીસે ભારતીય ન્યાય સંહિતા અને આઈટી એક્ટની વિવિધ કલમો હેઠળ ગુનો નોંધીને બેંક ખાતાઓની વિગતો મેળવવાની પ્રક્રિયા હાથ ધરી છે.

સાયબર ક્રાઈમ છેતરપિંડી

શેરબજારમાં રોકાણ અને નફાની લાલચ આપી કુડાસણના વેપારી પાસેથી રૂ. 13.79 લાખ પડાવી લેતી ગેંગ

February 21, 2026 | 17:38 IST