મહિલાઓના ફોટાનો દુરુપયોગ કરતા 120 એકમો પર FIR

અમદાવાદ ક્રાઈમ બ્રાન્ચે ડિજિટલ સુરક્ષા અને મહિલાઓની ગરિમા જાળવવા માટે એક અત્યંત મહત્વનું ઓપરેશન પાર પાડ્યું છે. સોશિયલ મીડિયા પર એસ્કોર્ટ સર્વિસના નામે અશ્લીલતા ફેલાવતા અને લોકો સાથે નાણાકીય છેતરપિંડી કરતા 120 જેટલા ઇન્સ્ટાગ્રામ, ફેસબુક અને વેબસાઇટ એકમો વિરુદ્ધ વિધિવત ફરિયાદ નોંધવામાં આવી છે.

AI ટેકનોલોજીનો ઘૃણાસ્પદ દુરુપયોગ : 

તપાસમાં બહાર આવ્યું છે કે આ ગુનેગારો અત્યાધુનિક આર્ટિફિશિયલ ઇન્ટેલિજન્સ (AI) નો ઉપયોગ કરીને મહિલાઓના વાંધાજનક ફોટા અને વીડિયો તૈયાર કરતા હતા. આ સામગ્રીને સોશિયલ મીડિયા પર પ્રસારિત કરી ગ્રાહકોને આકર્ષવામાં આવતા હતા. ગુનેગારોએ અમદાવાદ માટે કલાક અને રાત્રિ રોકાણના ચોક્કસ દરો નક્કી કરી જાહેરાતો પણ આપી હતી.

છેતરપિંડીની પદ્ધતિ : 

આ ટોળકી માત્ર અશ્લીલતા જ નહીં, પરંતુ મોટા પાયે સાયબર છેતરપિંડી પણ કરી રહી હતી. લલચામણી જાહેરાતો જોઈ સંપર્ક કરનાર નાગરિકો પાસેથી UPI મારફતે અગાઉથી નાણાં પડાવવામાં આવતા હતા અને પેમેન્ટ મળ્યા બાદ તેમની સાથે છેતરપિંડી આચરવામાં આવતી હતી. મહિલાઓની ગરિમાને ઠેસ પહોંચાડતા આ નેટવર્કને તોડવા માટે ક્રાઈમ બ્રાન્ચે ટેકનિકલ એનાલિસિસનો સહારો લીધો છે.

કડક કાનૂની કાર્યવાહી :

પોલીસે આ કેસમાં ભારતીય ન્યાય સંહિતા (BNS) ની વિવિધ કલમો જેવી કે સ્ત્રીની ગરિમાને ઠેસ પહોંચાડવી, છેતરપિંડી તેમજ આઈટી એક્ટની કલમ 67 હેઠળ ગુનો નોંધ્યો છે. આ કેસની સંવેદનશીલતાને જોતા તમામ વિગતોને ગુપ્ત રાખવામાં આવી છે જેથી પુરાવા સાથે છેડછાડ ન થાય.

નાગરિકો માટે પોલીસની ચેતવણી : 

ક્રાઈમ બ્રાન્ચે જાહેર જનતાને અપીલ કરી છે કે અજાણ્યા સોશિયલ મીડિયા હેન્ડલ્સ કે વેરિફિકેશન વગરના UPI ID પર ક્યારેય નાણાં ટ્રાન્સફર ન કરવા. આવી ગેરકાયદેસર પ્રવૃત્તિઓથી દૂર રહી સાયબર સુરક્ષિત રહેવા માટે પોલીસ દ્વારા ખાસ તાકીદ કરવામાં આવી છે.