Film Awards: 'વશ'ને બેસ્ટ ગુજરાતી ફિલ્મ

ભારતીય સિનેમા જગતનો સૌથી પ્રતિષ્ઠિત એવો 71મો રાષ્ટ્રીય ફિલ્મ પુરસ્કાર સમારોહ આજે નવી દિલ્હીના વિજ્ઞાન ભવનમાં ભવ્યતાપૂર્વક યોજાયો. રાષ્ટ્રપતિ દ્રોપદી મુર્મૂના હસ્તે ભારતીય ફિલ્મ કલાકારોને તેમના અદ્વિતીય કાર્ય માટે સન્માનિત કરવામાં આવ્યા. આ પુરસ્કાર સમારોહમાં બોલીવુડના સુપરસ્ટાર શાહરૂખ ખાન, રાની મુખર્જી, મોહનલાલ અને ગુજરાતના દિગ્ગજ કલાકારો સહિત અનેક મહાનુભાવો ઉપસ્થિત રહ્યા હતા. આ પુરસ્કારોની જાહેરાત 1 ઓગસ્ટ, 2025ના રોજ કરવામાં આવી હતી.

આ વર્ષે પુરસ્કારોમાં બોલીવુડ અને પ્રાદેશિક સિનેમાનો દબદબો જોવા મળ્યો હતો. સુપરસ્ટાર શાહરૂખ ખાનને તેની બ્લોકબસ્ટર ફિલ્મ 'જવાન' માટે શ્રેષ્ઠ અભિનેતાનો રાષ્ટ્રીય પુરસ્કાર એનાયત કરવામાં આવ્યો. આ ફિલ્મે બોક્સ ઓફિસ પર અનેક રેકોર્ડ તોડ્યા હતા અને વિશ્વભરમાં સફળતાના શિખરો સર કર્યા હતા. શાહરૂખ ખાને આ ફિલ્મમાં ડબલ રોલ કરીને પોતાના અભિનયની નવી ઊંચાઈઓ બતાવી, અને સાબિત કર્યું કે તે માત્ર રોમાન્સના રાજા જ નહીં, પરંતુ એક વર્સેટાઇલ અભિનેતા પણ છે. આ પુરસ્કારથી તેના ચાહકોમાં ખુશીની લહેર ફરી વળી છે. બીજી તરફ, અભિનેત્રી રાની મુખર્જીને તેની ફિલ્મ 'મિસિસ ચેટર્જી વર્સિસ નોર્વે'માં કરેલા દમદાર અભિનય બદલ શ્રેષ્ઠ અભિનેત્રીનો પુરસ્કાર મળ્યો છે.

આ સન્માન સમારોહમાં ગુજરાતી સિનેમા પણ પાછળ રહ્યું નહોતું. ગુજરાતી ફિલ્મ 'વશ'ને બેસ્ટ ગુજરાતી ફિલ્મનો રાષ્ટ્રીય પુરસ્કાર મળ્યો, જે ગુજરાતી સિનેમા માટે ગૌરવની વાત છે. આ ફિલ્મની સફળતા બાદ તેના પરથી બોલીવુડમાં 'શૈતાન' નામથી રિમેક બનાવવામાં આવી હતી. 'વશ'ના દિગ્દર્શક કૃષ્ણદેવ યાજ્ઞિક અને કલ્પેશ સોનીએ આ પુરસ્કાર સ્વીકાર્યો હતો. આ સિવાય, 'વશ' ફિલ્મમાં તેના શાનદાર અભિનય માટે અભિનેત્રી જાનકી બોડીવાલાને બેસ્ટ સહ અભિનેત્રીનો પુરસ્કાર પણ મળ્યો છે, જે એક ગુજરાતી અભિનેત્રી માટે મોટી સિદ્ધિ છે.

આ ઉપરાંત, વિવિધ કેટેગરીમાં અન્ય કલાકારોને પણ સન્માનિત કરવામાં આવ્યા હતા. અભિનેતા વિક્રાંત મેસીને પણ તેની ફિલ્મ '12th ફેલ' માટે શ્રેષ્ઠ અભિનેતાનો પુરસ્કાર મળ્યો હતો. ફિલ્મને બેસ્ટ ફીચર ફિલ્મનો પણ પુરસ્કાર એનાયત કરાયો હતો. દાદાસાહેબ ફાળકે પુરસ્કાર મલયાલમ સુપરસ્ટાર મોહનલાલને એનાયત કરાયો હતો. આ પુરસ્કાર સમારોહમાં 'રોકી ઔર રાની કી પ્રેમ કહાની'ને બેસ્ટ લોકપ્રિય ફિલ્મ, 'ધ કેરળ સ્ટોરી'ને બેસ્ટ દિગ્દર્શન અને સિનેમેટોગ્રાફી, અને 'કઠલ: અ જેકફ્રૂટ મિસ્ટ્રી'ને બેસ્ટ હિન્દી ફિલ્મનો પુરસ્કાર મળ્યો હતો. એકંદરે, આ પુરસ્કારોએ ભારતીય સિનેમાની વિવિધતા અને ગુણવત્તાને વૈશ્વિક મંચ પર ઉજાગર કરી છે.