હોળી-ધૂળેટી પર્વ પર ગુજરાતમાં ઇમરજન્સી સેવાઓ સજ્જ

ગુજરાતમાં હોળી અને ધૂળેટીના તહેવાર દરમિયાન ઈમરજન્સી સેવાઓ દ્વારા અભૂતપૂર્વ તૈયારીઓ કરવામાં આવી છે. 108 ઇમરજન્સી સર્વિસે અગાઉના વર્ષોના ડેટાનો અભ્યાસ કરીને એક ચોંકાવનારું 'ફોરકાસ્ટ' (અંદાજ) જાહેર કર્યું છે, જે મુજબ ધૂળેટીના દિવસે ઇમરજન્સી કેસોમાં ભારે ઉછાળો જોવા મળી શકે છે.

ઇમરજન્સી કેસોમાં સંભવિત વધારો

108 ના ડેટા મુજબ, હોળીના દિવસે ઇમરજન્સી કેસોમાં 12.31% અને ધૂળેટીના દિવસે 44.13% વધારો થવાની શક્યતા છે. ખાસ કરીને માર્ગ અકસ્માતમાં હોળીમાં 54% અને ધૂળેટીમાં 127% વધારો, આ રમતિયાળ ઉત્સવમાં મારામારીમાં પણ હોળીમાં 92% અને ધૂળેટીમાં રેકોર્ડબ્રેક 401.16% વધારો નોંધાયો છે. આ ઉપરાંત ધૂળેટીના દિવસે પાણીમાં ડૂબી જવાના કેસોમાં 125% ધરખમ ચિંતાજનક વધારો થવાની ભીતિ છે. 

મેગા ડિપ્લોયમેન્ટ પ્લાન

આ સ્થિતિને પહોંચી વળવા માટે રાજ્યભરમાં 1,750 એમ્બ્યુલન્સ તૈનાત કરવામાં આવી છે, જેમાં 800 જેટલી 108 રોડ એમ્બ્યુલન્સ, 38 ICU ઓન રોડ, 1 એર એમ્બ્યુલન્સ અને 2 બોટ એમ્બ્યુલન્સનો સમાવેશ થાય છે. ગૂગલ મેપ દ્વારા અકસ્માતના સંભવિત 'હોટસ્પોટ' નક્કી કરીને ત્યાં એમ્બ્યુલન્સ અગાઉથી જ ડિપ્લોય કરવામાં આવશે.

હવે 100 કે 108 નહીં, 112 છે નવો 'જનરક્ષા' નંબર

ભારત સરકાર અને ગુજરાત સરકાર દ્વારા હવે તમામ ઇમરજન્સી સેવાઓ માટે એક જ નંબર '112' અમલમાં મૂકવામાં આવ્યો છે. જે રીતે અમેરિકામાં 911 નંબર કાર્યરત છે, તે જ તર્જ પર ગુજરાતમાં 112 ની સેવા શરૂ કરાઈ છે.

112 નંબરની વિશેષતાઓ:

• ઓલ-ઇન-વન: પોલીસ (100), મેડિકલ (108), મહિલા હેલ્પલાઇન (181) અને ફાયર (101) - આ તમામ સેવાઓ હવે માત્ર 112 ડાયલ કરવાથી મળશે.

• ઝડપી રિસ્પોન્સ: ગુજરાતમાં રિસ્પોન્સ ટાઈમ 24 મિનિટથી ઘટીને માત્ર 12 મિનિટ કરવામાં આવ્યો છે.

• લોકેશન ટ્રેકિંગ: ઇમરજન્સી એપ્લિકેશન દ્વારા ફરિયાદીના સચોટ લોકેશનના આધારે સરનામું શોધવામાં મદદ મળશે.

• કનેક્ટિવિટી: આ પ્રોજેક્ટ હેઠળ 1,000 PCR વાન અને 400 ફાયર ફાઈટર ગાડીઓનું જોડાણ કરવામાં આવ્યું છે.