ગુજરાતમાં બેવડી ઋતુનો માર, રોગચાળો વકર્યો

ગુજરાતમાં છેલ્લા કેટલાક દિવસોથી વાતાવરણ વિચિત્ર વળાંક લઈ રહ્યું છે. વહેલી સવારે અને મોડી રાત્રે લઘુત્તમ તાપમાન નીચું રહેતા ઠંડક અનુભવાય છે, જ્યારે બપોરના સમયે સૂર્યદેવ આકરા મિજાજમાં જોવા મળે છે.

હવામાનની આ 'સંતાકૂકડી'ને કારણે રાજ્યમાં બેવડી ઋતુનો અનુભવ થઈ રહ્યો છે, જેણે જાહેર આરોગ્ય માટે ખતરાની ઘંટડી વગાડી છે.

હોસ્પિટલો દર્દીઓથી ઉભરાઈ વાતાવરણમાં આવેલા આ અચાનક પલટાને કારણે અમદાવાદ, રાજકોટ અને સુરત સહિતના શહેરોમાં વાયરલ ઇન્ફેક્શન, શરદી, ઉધરસ અને તાવના કેસોમાં ચિંતાજનક વધારો થયો છે. ખાસ કરીને બાળકો અને વૃદ્ધો આ મિક્સ સીઝનનો ભોગ બની રહ્યા છે. ડોક્ટરો આ સમયગાળામાં ઠંડા પીણાં ટાળવા અને સાવચેતી રાખવાની સલાહ આપી રહ્યા છે.

હવામાન વિભાગની આગાહી સ્થાનિક હવામાન વિભાગના જણાવ્યા મુજબ, આગામી સાત દિવસ દરમિયાન રાજ્યના તાપમાનમાં કોઈ મોટો ફેરફાર થવાની શક્યતા નથી. 14 ફેબ્રુઆરી સુધી હવામાન સંપૂર્ણ શુષ્ક રહેશે અને વરસાદની કોઈ શક્યતા નથી.

જોકે, 15 ફેબ્રુઆરી બાદ પશ્ચિમી વિક્ષોભ (Western Disturbance) સક્રિય થવાને કારણે ઉત્તર ભારતના પહાડી વિસ્તારોમાં હિમવર્ષા થઈ શકે છે, જેની સીધી અસર ગુજરાતના તાપમાન પર પડશે અને ઠંડીનું જોર ફરી એકવાર વધી શકે છે.

મહારાષ્ટ્ર અને દેશનું હવામાન મહારાષ્ટ્રમાં પણ હાલમાં સવાર-બપોરના તાપમાનમાં 1 થી 2 ડિગ્રીનો ઉતાર-ચઢાવ જોવા મળી રહ્યો છે. વિદર્ભ અને મરાઠવાડામાં રાત્રિના સમયે ઠંડીનો અનુભવ થઈ રહ્યો છે.

બીજી તરફ, ઉત્તર ભારતના મેદાની વિસ્તારોમાં તાપમાન ઝડપથી વધી રહ્યું છે. બંગાળની ખાડીમાં સર્જાયેલા ટ્રફના કારણે દરિયાકાંઠાના વિસ્તારોમાં તેજ પવન ફૂંકાવાની શક્યતા હોવાથી માછીમારોને દરિયો ન ખેડવાની ચેતવણી આપવામાં આવી છે.