સમગ્ર ઉત્તર ભારત સહિત ગુજરાતમાં પણ કાતિલ ઠંડી અને ગાઢ ધુમ્મસની અસર જોવા મળી રહી છે. આ પ્રતિકૂળ હવામાનની સૌથી વધુ અસર અમદાવાદના સરદાર વલ્લભભાઈ પટેલ ઇન્ટરનેશનલ એરપોર્ટ પરના હવાઈ સંચાલન પર પડી છે. વહેલી સવારથી છવાયેલા ગાઢ ધુમ્મસને કારણે રનવે પર દ્રશ્યતાનું સ્તર ઘટી જતા કુલ 15 જેટલી ફ્લાઇટ્સ કલાકો સુધી વિલંબિત થઈ હતી.
ઓછી વિઝિબિલિટીને કારણે ફ્લાઇટ શિડ્યુલ પ્રભાવિત :&nbsp;
શહેરમાં વહેલી સવારથી ધુમ્મસની ગાઢ ચાદર છવાઈ જતાં એર ટ્રાફિક કંટ્રોલ દ્વારા સુરક્ષાના પગલે ફ્લાઇટ્સના ટેકઓફ અને લેન્ડિંગ પર નિયંત્રણ મૂકવામાં આવ્યું હતું. દ્રશ્યતા અત્યંત ઓછી હોવાથી પાયલોટોને મુશ્કેલી પડી હતી, જેના કારણે મુંબઈ, દિલ્હી, ચેન્નાઈ અને દોહા જેવી મહત્વની ફ્લાઇટ્સ તેના નિયત સમય કરતાં મોડી પડી હતી. એરપોર્ટ પર કલાકો સુધી પ્રતીક્ષા કરવાને કારણે પ્રવાસીઓએ ભારે હાલાકી ભોગવવી પડી હતી.
મુસાફરો માટે એરલાઇન્સની મહત્વની સૂચના :&nbsp;
હવામાનની સ્થિતિને ધ્યાનમાં રાખીને ઈન્ડિગો અને એર ઈન્ડિયા જેવી કંપનીઓએ એડવાઇઝરી જાહેર કરી છે. એરલાઇન્સ દ્વારા મુસાફરોને વિનંતી કરવામાં આવી છે કે તેઓ એરપોર્ટ માટે નીકળતા પહેલા પોતાની ફ્લાઇટનું સ્ટેટસ ઓનલાઇન ચેક કરી લે. કનેક્ટિંગ ફ્લાઇટ્સ ધરાવતા મુસાફરોને વધુ અસર થઈ રહી છે કારણ કે દિલ્હી અને લખનૌ જેવા શહેરોમાં પણ હવામાન ખરાબ હોવાથી ફ્લાઇટ્સ મોડી આવી રહી છે.
મોડી પડેલી મુખ્ય ફ્લાઇટ્સની યાદી :&nbsp;
અમદાવાદ આવતી ફ્લાઇટ્સમાં સ્ટાર એરની પૂર્ણિયા, સ્પાઇસજેટની ચેન્નાઈ અને કતાર એરવેઝની દોહા ફ્લાઇટનો સમાવેશ થાય છે. જ્યારે અમદાવાદથી ઉપડતી સ્પાઇસજેટ દિલ્હી, ઈન્ડિગો ગાઝિયાબાદ અને એર ઇન્ડિયાની મુંબઈ-દિલ્હી જેવી ફ્લાઇટ્સના સમયમાં ફેરફાર કરવામાં આવ્યો હતો.

ધુમ્મસના કારણે વિઝિબિલિટી ઘટતા ફ્લાઇટ શિડ્યુલ ખોરવાયું, એરપોર્ટ પર સેંકડો મુસાફરો અટવાયા

February 4, 2026 | 15:00 IST