સોશિયલ મીડિયા પર વાયરલ થવાની લાલચ હવે યુવાનો માટે જીવલેણ સાબિત થતી જાય છે. સુરતના સચિન રેલવે સ્ટેશન નજીક એક યુવતીએ ધમધમતા રેલવે ટ્રેક પર ફિલ્મી ગીત પર રીલ બનાવી, જે સોશિયલ મીડિયા પર વાઈરલ થતા જ રેલવે તંત્ર હરકતમાં આવ્યું છે.
વાયરલ વીડિયોમાં યુવતી બિનડર રેલવે પાટા વચ્ચે ચાલતી અને પોઝ આપતી નજરે પડે છે. આ ટ્રેક પરથી દિવસ-રાતે તેજ ગતિએ એક્સપ્રેસ અને માલગાડીઓ પસાર થાય છે. જો શૂટિંગ દરમિયાન અચાનક ટ્રેન આવી હોત, તો ગંભીર અકસ્માત ટાળવો મુશ્કેલ બનતો. માત્ર થોડા સેકન્ડની પ્રસિદ્ધિ માટે યુવતીએ પોતાનો અમૂલ્ય જીવ જોખમમાં મૂક્યો હોવાની ચર્ચા શરૂ થઈ છે.
રેલવે પ્રોટેક્શન ફોર્સ (RPF) મુજબ, રેલવે ટ્રેક પર અનધિકૃત પ્રવેશ કે શૂટિંગ કરવું કાયદેસર ગુનો છે. રેલવે એક્ટની કલમ 147 હેઠળ દંડ અને જેલની સજા બંનેની જોગવાઈ છે. આ ઘટનામાં યુવતીએ માત્ર પોતાની સુરક્ષા નહીં, પરંતુ કાયદાનું પણ ખુલ્લેઆમ ઉલ્લંઘન કર્યું હોવાનું સામે આવ્યું છે.
ઘટનાની ગંભીરતા એ કારણે પણ વધી ગઈ છે કે રાજકોટમાં તાજેતરમાં જ સેલ્ફી લેવાના ચક્કરમાં વંદે ભારત ટ્રેનની અડફેટે ત્રણ લોકો આવી ગયા હતા, જેમાં બે લોકોના મોત થયા હતા. આવા બનાવો છતાં યુવાનો જોખમી સ્ટન્ટ્સથી દૂર રહેતા નથી, એ બાબતે ચિંતા વ્યક્ત કરવામાં આવી રહી છે.
સ્થાનિક લોકોનું કહેવું છે કે જો આવા કિસ્સાઓમાં કડક કાર્યવાહી ન કરવામાં આવે, તો અન્ય યુવાનો પણ આવા જોખમી સાહસો કરવા પ્રેરાશે. રેલવે વિભાગે સચિન વિસ્તારના CCTV ફૂટેજ અને સોશિયલ મીડિયા અકાઉન્ટના આધારે યુવતીની ઓળખ માટે તપાસ શરૂ કરી છે.
દરમિયાન, યુવતીએ સોશિયલ મીડિયા પર વીડિયો જાહેર કરીને માફી માગી છે. તેણે કહ્યું કે રીલ ક્યારે અને કેવી રીતે વાયરલ થઈ તે તેને ખબર નહોતી અને હવે તે અન્ય કોઈને આવી ભૂલ ન કરવા અપીલ કરે છે. જોકે, રેલવે વિભાગે સ્પષ્ટ કર્યું છે કે તપાસ પૂર્ણ થયા બાદ નિયમ મુજબ કાર્યવાહી કરવામાં આવશે.&nbsp;
&nbsp;

રેલવે ટ્રેક પર યુવતીની જોખમી રીલ

સુરતના સચિન રેલવે ટ્રેક પર રીલ બનાવતા યુવતીનો વીડિયો વાઈરલ થતા સુરત રેલવે વિભાગ હરકતમાં

February 3, 2026 | 14:46 IST