ક્રાઈમ બ્રાન્ચની કારે અકસ્માત સર્જતા હોબાળો

વડોદરામાં લૂંટના આરોપીને પકડવા આવેલી અમદાવાદ ક્રાઈમ બ્રાન્ચની ટીમે અકસ્માત સર્જતા લોકોનો રોષ

અમદાવાદના બગોદરા પાસે થયેલી લૂંટના ગુનામાં સંડોવાયેલા આરોપીને પકડવા આવેલી અમદાવાદ ક્રાઈમ બ્રાન્ચની ટીમને વડોદરાના ફતેગંજ વિસ્તારમાં કડવો અનુભવ થયો હતો. આરોપીની ધરપકડ બાદ પરત ફરતી વખતે પોલીસ કર્મચારીએ ડ્રાઈવિંગ દરમિયાન બે થી ત્રણ વાહનોને અડફેટે લેતા સ્થાનિકોએ ભારે હોબાળો મચાવ્યો હતો.

મળતી માહિતી મુજબ, બગોદરા લૂંટ કેસનો મુખ્ય આરોપી વડોદરાના ફતેગંજ વિસ્તારમાં છુપાયો હોવાની ચોક્કસ બાતમી અમદાવાદ ક્રાઈમ બ્રાન્ચને મળી હતી. આ ઓપરેશન પાર પાડવા માટે ક્રાઈમ બ્રાન્ચની ટીમ વડોદરા પહોંચી હતી અને ફતેગંજ પોલીસ સ્ટેશન નજીકથી આરોપીને ઝડપી પાડ્યો હતો. આરોપીની સાથે લૂંટમાં વપરાયેલી સ્કોર્પિયો કાર પણ પોલીસે કબજે કરી હતી.

જોકે, જ્યારે પોલીસ જવાનો આ સ્કોર્પિયો કાર લઈને પરત ફરી રહ્યા હતા ત્યારે ડ્રાઈવિંગ કરી રહેલા કર્મચારીએ સંતુલન ગુમાવતા રસ્તા પરના વાહનોને ટક્કર મારી હતી. આ અકસ્માતને પગલે વાહનચાલકો અને રહીશો એકઠા થઈ ગયા હતા અને પોલીસ હોવા છતાં બેદરકારી બદલ કર્મચારીઓનો ઉધડો લીધો હતો. સ્થાનિકોએ કારને ઘેરી લઈને પોલીસકર્મીઓ પાસે ઓળખપત્રની માંગણી કરી હતી, જેના કારણે સ્થળ પર ઘર્ષણ જેવી સ્થિતિ સર્જાઈ હતી.

ઘટનાની ગંભીરતા જોતા ફતેગંજ પોલીસનો કાફલો તાત્કાલિક સ્થળ પર પહોંચ્યો હતો. સ્થાનિક પોલીસે મધ્યસ્થી કરીને ઉશ્કેરાયેલા ટોળાને શાંત પાડ્યું હતું. અંતે મામલો થાળે પડતા અમદાવાદ ક્રાઈમ બ્રાન્ચની ટીમ આરોપી અને કબજે કરેલી કાર સાથે અમદાવાદ જવા રવાના થઈ હતી.