જૂનાગઢની પવિત્ર ગિરનાર તળેટીમાં ભજન, ભોજન અને ભક્તિના પર્વ સમાન મહાશિવરાત્રીના મેળાની તમામ તૈયારીઓ વહીવટી તંત્ર દ્વારા પૂર્ણ કરી દેવામાં આવી છે. આ વર્ષે મેળાને 'મિની કુંભ' તરીકે ઉજવવામાં આવી રહ્યો હોવાથી શ્રદ્ધાળુઓ માટે વિશેષ સુવિધાઓ ઉભી કરવામાં આવી છે. 11 ફેબ્રુઆરીથી શરૂ થતો આ મેળો 15 ફેબ્રુઆરીએ શિવરાત્રીની શાહી રવાડી સાથે સંપન્ન થશે.
વહીવટી તંત્ર દ્વારા સજ્જ વ્યવસ્થાઓ :&nbsp;
છેલ્લા એક મહિનાથી વહીવટી તંત્રની વિવિધ સમિતિઓ દ્વારા લાઈટ, પાણી, રોડ અને શૌચાલય જેવી પાયાની સુવિધાઓ માટે કામગીરી કરવામાં આવી રહી હતી. મેળાના વિસ્તારમાં ભીડને નિયંત્રિત કરવા માટે ગિરનાર દરવાજા અને ભરડાવાવથી ખાનગી વાહનોના પ્રવેશ પર પ્રતિબંધ લાદવામાં આવ્યો છે. શ્રદ્ધાળુઓની સુવિધા માટે વિવિધ 25 સ્થળોએ પાર્કિંગની વ્યવસ્થા કરવામાં આવી છે. 3.5 કિલોમીટરના મેળાના રૂટ પર આકર્ષક લાઇટિંગ અને સેલ્ફી પોઇન્ટ્સ પણ તૈયાર કરાયા છે.
ધાર્મિક અને સાંસ્કૃતિક કાર્યક્રમોનું આકર્ષણ :&nbsp;
મેળાના પ્રથમ દિવસે જિલ્લા પંચાયત ગેસ્ટ હાઉસથી ભવનાથ મંદિર સુધી ભવ્ય 'ડમરું યાત્રા' નીકળશે, જેમાં મોટી સંખ્યામાં સાધુ-સંતો જોડાશે. ત્યારબાદ ભવનાથ મંદિરે મહાઆરતીનું આયોજન છે. 11 થી 14 ફેબ્રુઆરી દરમિયાન દરરોજ રાત્રે સાંસ્કૃતિક કાર્યક્રમો યોજાશે. મેળાનું મુખ્ય આકર્ષણ 15 ફેબ્રુઆરીની મધ્યરાત્રિએ નીકળનારી સાધુ-સંતોની રવાડી રહેશે, જેમાં 40થી વધુ બગીઓમાં સંતો દર્શન આપશે અને મૃગી કુંડમાં શાહી સ્નાન સાથે મેળાની પૂર્ણાહુતિ થશે.
સંતોની સ્વચ્છતા અને સહકારની અપીલ :&nbsp;
ભવનાથના જાણીતા આશ્રમોના સંતોએ શ્રદ્ધાળુઓને ભાવભર્યું આમંત્રણ પાઠવ્યું છે. ભારતી આશ્રમના મહંત અને ગુરુ ગોરખનાથ આશ્રમના મહંતોએ લોકોને અપીલ કરી છે કે મેળા દરમિયાન સ્વચ્છતા જાળવી રાખવી અને વહીવટી તંત્રને સંપૂર્ણ સહકાર આપવો. મેળાના પાંચ દિવસ દરમિયાન વિવિધ આશ્રમો અને ઉતારાઓમાં અન્નક્ષેત્રો ધમધમશે, જ્યાં લાખો શ્રદ્ધાળુઓ પ્રસાદ ગ્રહણ કરશે.&nbsp;

ભવનાથ મહાશિવરાત્રી મેળો

ભજન, ભોજન અને ભક્તિનો ત્રિવેણી સંગમ; આવતીકાલથી જૂનાગઢની તળેટીમાં શિવરાત્રી મેળાનો પ્રારંભ

February 10, 2026 | 19:21 IST