સુરત અને અમદાવાદમાં અર્થતંત્રને  ખોખલું કરવાનો પ્રયાસ

સુરત અને અમદાવાદમાં અર્થતંત્રને  ખોખલુ કરવાનો પ્રયાસ કરનારા શખ્સો ઝડપાયા છે. પોલીસે અંદાજે અઢી કરોડથી વધુ નકલી નોટો કબજે કરી છે.

સુરતની સારોલી પોલીસે બાતમીના આધારે નિયોલ ચેકપોસ્ટ પાસેથી પગપાળા જઇ રહેલા ત્રણ યુવકોને ઝડપી લીધા હતા. તમામ આરોપીઓ મહારાષ્રના અહેમદનગરના રહેવાસી છે અને તેમની તલાશી લેવાતા બેગમાંથી 500 અને 200 રુપિયાના દરની ચલણી નોટોના બંડલો જોવા મળ્યા હતા જેથી પોલીસ પણ ચોંકી ઉઠી હતી. તપાસમાં જોવા મળ્યું કે 500 અને 200ના દરના બંડલોમાં પહેલી અને છેલ્લી નોટ જ અસલી હતી જ્યારે બાકીની નોટ નકલી હતી.

 પોલીસે 500ની દરના નકલી નોટોના 43 બંડલો જપ્ત કરી તપાસ કરતાં 42914 નોટો નકલી હતી જ્યારે 200ના દરી નોટોની તપાસ કરતાં 20958 નોટ નકલી હતી. પોલીસે કુલ 2.56 કરોડની નકલી નોટો જપ્ત કરી હતી. તપાસમાં વિલેપાર્લેના રાહુલ કાલે નામના શખ્સે નોટો આપી હોવાનું અને તે સુરતની હોટલમાં જ રોકાયો હોવાની પોલીસને જાણવા મળ્યું હતું. જો કે ગંધ આવી જતાં રાહુલ ફરાર થઇ ગયો હતો. આ નકલી નોટો સુરતના વિવિધ બજારમાં ફરતી કરવાનો તેમનો મનસૂબો હતો અને તેનો નફો તમામ સરખે ભાગે વહેંચી લેવાના હતા.

અમદાવાદમાંથી પોલીસે 500 ના દર ની નકલી નોટોના જથ્થા સાથે 6 લોકોને ઝડપી લીધા છે. તેમની પાસેથી 247 નકલી નોટો મળી આવી છે.આરોપીઓ મૂળ મધ્યપ્રદેશના રહેવાસી છે, જેમાંથી ચાર આરોપીઓ મધ્યપ્રદેશમાં પોતાના વતન શીલોલીમાં સાધન સામગ્રી મેળવીને અલગ અલગ સ્થળોએ નકલી નોટો છાપતા હતા. નકલી નોટ છાપીને આરોપીઓ અમદાવાદમાં વટાવવા માટે આવ્યા હતા. હાલ તમામ આરોપીઓની ધરપકડ કરીને વધુ તપાસ શરૂ કરવામાં આવી છે. સોલા પોલીસે આરોપીઓ ખરીદી કરે તે પહેલાં જ તમામને ઝડપી પાડ્યા છે. સોલા પોલીસે બાતમીના આધારે ચાણક્યપુરી શાક માર્કેટમાંથી દીપક જાટવ, ઉમેશ જાટવ, વિકાસ જાટવ, ધર્મેન્દ્ર જાટવ અને ઋષિકેશ જાટવ સહિત 6 આરોપીઓની ધરપકડ કરી છે. આ આરોપીઓની તપાસ દરમિયાન તેમની પાસેથી રૂપિયા 500ના દરની 247 નકલી નોટો મળી આવી હતી.