વડોદરાના નવાયાર્ડ વિસ્તારમાં એક હૃદયદ્રાવક ઘટના સામે આવી છે, જેમાં એક નિર્દોષ કિશોરી નરાધમોની હેવાનિયતનો ભોગ બની છે. સવારે ઘરેથી નીકળેલી સગીરા રહસ્યમય રીતે ગુમ થયા બાદ, તેને ચાર કલાક સુધી એક મકાનમાં બંધક બનાવી બે શખ્સોએ તેની લાજ લૂંટી હોવાની ચોંકાવનારી વિગતો બહાર આવી છે. આ ઘટનાએ સંસ્કારી નગરીના સુરક્ષાના દાવાઓ સામે ગંભીર સવાલો ઉભા કર્યા છે.
ભોગ બનનાર કિશોરીને મેડિકલ તપાસ માટે વડોદરાની SSG હોસ્પિટલમાં ખસેડવામાં આવી હતી. પોતાની વહાલસોયી દીકરી સાથે થયેલા અત્યાચારથી વ્યથિત સ્વજનોનો પિત્તો ગયો હતો. પરિવારજનોએ પોલીસની ઢીલી કામગીરી અને આરોપીઓને છાવરવાના આક્ષેપ સાથે હોસ્પિટલ પરિસરમાં ભારે હોબાળો મચાવ્યો હતો. પીડિતાના માતા-પિતાની એક જ માંગ છે કે તેમની દીકરીને પિખી નાખનાર નરાધમોને કડકમાં કડક સજા થાય. સમાજના આગેવાનોએ નામના સુરક્ષિત ગણાતા શહેરમાં ધોળા દિવસે થતાં આવા કૃત્યોની ઘોર નિંદા કરી છે.&nbsp;
પોલીસ સૂત્રોના જણાવ્યા અનુસાર, ફતેગંજ પોલીસ મથકે આ મામલે ગુનો નોંધવામાં આવ્યો છે. આ કાળા કૃત્યમાં હર્ષિત મેકવાન અને 'હેપ્પી' નામના બે શખ્સોના નામ ખુલ્યા છે. પોલીસે કાર્યવાહી કરતા હર્ષિતની ધરપકડ કરી લીધી છે, જ્યારે હેપ્પી નામનો શખ્સ હજુ પોલીસ પકડથી દૂર છે. 
બીજી તરફ, પરિવારે ગંભીર આક્ષેપ કર્યો છે કે ઘટનાના કલાકો બાદ પણ પોલીસે તાત્કાલિક પગલાં લીધા ન હતા. હાલમાં સમગ્ર વડોદરામાં આ ઘટનાને લઈને રોષની લાગણી છે અને ફરાર આરોપીને ઝડપી પાડવા ચક્રો ગતિમાન કરાયા છે.

વડોદરામાં સગીરા પર સામુહિક દુષ્કર્મ

સગીરાને મકાનમાં બંધક બનાવી આચર્યું સામૂહિક દુષ્કર્મ; SSG હોસ્પિટલમાં પરિજનોનો આક્રોશ.

January 9, 2026 | 17:20 IST