AMC એડવાન્સ પ્રોપર્ટી ટેક્સમાં મળશે 15% સુધી વળતર

અમદાવાદના કરદાતાઓ માટે ખુશીના સમાચાર સામે આવ્યા છે. અમદાવાદ મ્યુનિસિપલ કોર્પોરેશન (AMC) ની રેવન્યુ કમિટી દ્વારા વર્ષ 2026-27 માટે એડવાન્સ પ્રોપર્ટી ટેક્સ ભરનારા નાગરિકો માટે આકર્ષક રિબેટ યોજનાની જાહેરાત કરવામાં આવી છે. આ યોજનાનો મુખ્ય ઉદ્દેશ્ય સમયસર ટેક્સની વસૂલાત અને ડિજિટલ પેમેન્ટને પ્રોત્સાહન આપવાનો છે.

કોને અને કેટલું વળતર મળશે ?

રેવન્યુ કમિટીના નિર્ણય મુજબ, આગામી 9 એપ્રિલથી 31 મે દરમિયાન એડવાન્સ ટેક્સ ભરનારા કરદાતાઓ અલગ-અલગ શ્રેણીમાં વળતર મેળવી શકશે:

સામાન્ય એડવાન્સ ટેક્સ: જે કરદાતાઓ આ સમયગાળામાં એડવાન્સ ટેક્સ ભરશે, તેમને સીધું 12% રિબેટ આપવામાં આવશે.

ઓનલાઇન પેમેન્ટ પર વિશેષ લાભ: ડિજિટલ ટ્રાન્ઝેક્શનને પ્રોત્સાહન આપવા માટે ઓનલાઇન ટેક્સ ભરનારાઓને 13% વળતર (1% વધારાનું) મળશે.

વફાદાર કરદાતાઓ માટે લોટરી: જે નાગરિકો છેલ્લા સતત 3 વર્ષથી ઓનલાઇન ટેક્સ ભરી રહ્યા છે, તેમને સૌથી વધુ 15% રિબેટનો લાભ મળશે.

વ્યાજમાફી સ્કીમને મળ્યો અભૂતપૂર્વ પ્રતિસાદ : 

શહેરમાં જાન્યુઆરી માસથી અમલમાં આવેલી વ્યાજમાફી યોજના અત્યંત સફળ રહી છે. આંકડાકીય માહિતી મુજબ, 25 ફેબ્રુઆરી સુધીમાં આ યોજના હેઠળ કોર્પોરેશનની તિજોરીમાં કુલ રૂ. 282.81 કરોડની આવક થઈ છે. તંત્ર દ્વારા આશરે રૂ. 22.99 કરોડનું વ્યાજ માફ કરવામાં આવ્યું છે, જેનાથી અનેક મધ્યમવર્ગીય પરિવારોને આર્થિક રાહત મળી છે. નોંધનીય છે કે આ સ્કીમ 31 માર્ચ સુધી કાર્યરત રહેશે.

સામાજિક જવાબદારી: પશુ કલ્યાણ સંસ્થાઓને ટેક્સમાંથી મુક્તિ

એએમસી દ્વારા આ બેઠકમાં એક પ્રશંસનીય સામાજિક નિર્ણય પણ લેવામાં આવ્યો છે. ચેરિટી કમિશનર હેઠળ નોંધાયેલી અને અબોલ પશુઓની સેવા કરતી સંસ્થાઓ, ગૌશાળાઓ અને પાંજરાપોળને હવે મિલકત વેરામાંથી મુક્તિ આપવામાં આવશે. આ ઐતિહાસિક નિર્ણયથી પશુ કલ્યાણના કાર્યોમાં જોડાયેલી સેવાભાવી સંસ્થાઓને મોટો આર્થિક ટેકો મળશે.