ગુજરાતમાં SC-ST અત્યાચાર કેસમાં ચિંતાજનક વધારો

ગુજરાતમાં અનુસૂચિત જાતિ (SC) અને અનુસૂચિત જનજાતિ (ST) પર થતા અત્યાચારના વધતા કેસોને લઈને રાજકીય માહોલ ગરમાયો છે. છેલ્લા પાંચ વર્ષના આંકડાઓ રાજ્યમાં કાયદો અને વ્યવસ્થા તેમજ સામાજિક સુરક્ષા અંગે ગંભીર પ્રશ્નો ઉભા કરે છે.

પ્રદેશ કોંગ્રેસના પ્રવક્તા ડૉ. હિરેન બેન્કરના જણાવ્યા મુજબ, છેલ્લા પાંચ વર્ષમાં રાજ્યમાં અનુસૂચિત જાતિ પર કુલ 13,629 અત્યાચારના કેસ નોંધાયા છે. આ આંકડાઓ પ્રમાણે દરરોજ સરેરાશ ત્રણથી વધુ દલિતો પર અત્યાચાર થવાની ઘટનાઓ સામે આવી રહી છે. નોંધનીય છે કે આ માત્ર નોંધાયેલા કેસો છે, જ્યારે ડર અને દબાણને કારણે અનેક કિસ્સાઓ નોંધાતા નથી તેવી પણ આશંકા વ્યક્ત કરવામાં આવી છે.

આદિવાસી સમાજ અંગે પણ ચિંતાજનક પરિસ્થિતિ સામે આવી છે. છેલ્લા પાંચ વર્ષમાં અનુસૂચિત જનજાતિ (ST) પર નવા 1,590 કેસ નોંધાયા છે, જ્યારે કુલ 3,553 કેસો ટ્રાયલ માટે બાકી છે. માહિતી મુજબ રાજ્યમાં દર 48 કલાકે એક આદિવાસી પર અત્યાચાર અથવા હુમલાની ઘટના બનતી હોવાનો દાવો કરવામાં આવ્યો છે.

વર્ષવાર આંકડાઓ મુજબ SC પર નવા કેસોમાં 2019માં 1416, 2020માં 1326, 2021માં 1201, 2022માં 1279 અને 2023માં 1373 કેસ નોંધાયા છે. બીજી તરફ ST માટે 2019માં 321, 2020માં 291, 2021માં 341, 2022માં 330 અને 2023માં 307 કેસ નોંધાયા છે.

અમદાવાદ, બનાસકાંઠા, સુરેન્દ્રનગર, રાજકોટ, કચ્છ અને જુનાગઢ જેવા જિલ્લાઓમાં પણ આવા કેસોમાં વધારો નોંધાયો છે. ઉપરાંત, ST અત્યાચારના કેસોમાં સજાનો દર ખૂબ ઓછો હોવાનું પણ ધ્યાન દોરવામાં આવ્યું છે.

કોંગ્રેસ દ્વારા રાજ્ય સરકાર પાસે પેન્ડિંગ કેસોને ફાસ્ટ ટ્રેક પર લાવવા, દલિત અને આદિવાસી સમાજની સુરક્ષા સુનિશ્ચિત કરવા અને કડક કાર્યવાહી કરવાની માંગ કરવામાં આવી છે. સમગ્ર મુદ્દે રાજકીય ચર્ચા તેજ બની છે.