કચ્છના માંડવી તાલુકાનું કાઠડા ગામ અત્યારે વિરોધના વંટોળ વચ્ચે ઘેરાયેલું છે. સરકાર દ્વારા એરસ્ટ્રીપ વિસ્તરણ પ્રોજેક્ટ માટે ગામની અંદાજે 212 એકર ગૌચર જમીન ફાળવવામાં આવી છે, જેને લઈને પશુપાલકો અને ગ્રામજનોમાં ભારે રોષ જોવા મળી રહ્યો છે. પોતાની આજીવિકા અને અબોલ પશુઓના ઘાસચારાના અસ્તિત્વ માટે હવે ગ્રામજનોએ આરપારની લડત લડવાનો નિર્ધાર કર્યો છે.
સમગ્ર વિવાદ
કાઠડા ગામની હજારો પશુઓ માટેની અનામત ગૌચર જમીન પર એરસ્ટ્રીપ બનાવવાનું આયોજન છે. તંત્ર દ્વારા આ જમીનના બદલામાં અન્ય કોઈ ગામમાં જમીન ફાળવવાની વાત કરવામાં આવી છે, પરંતુ સ્થાનિકોનું કહેવું છે કે પશુઓને ચરવા માટે બીજા ગામ સુધી લઈ જવા વ્યવહારુ નથી. આ ગૌચર કપાતમાં જવાથી પશુપાલન પર નિર્ભર પરિવારો પાયમાલ થઈ જશે તેવી ભીતિ સેવવામાં આવી રહી છે.
દીકરીઓએ PMને લખ્યો પત્ર:
આ લડતમાં હવે ગામની મહિલાઓ અને નાની બાલિકાઓ પણ જોડાઈ છે. થોડા દિવસો અગાઉ જ ગામની દીકરીઓએ વડાપ્રધાન નરેન્દ્ર મોદીને સંબોધીને હૃદયસ્પર્શી પત્રો લખ્યા હતા. જેમાં તેઓએ પોતાની 'ગૌમાતા' માટે જમીન બચાવવા આજીજી કરી છે. ગ્રામજનોની માંગ છે કે એરસ્ટ્રીપ પ્રોજેક્ટને અન્ય બિનઉપજાઉ જમીન પર ખસેડવામાં આવે.
અખિલ કચ્છ ચારણ સભાનો ટેકો:
આ વિરોધ હવે મોટું સ્વરૂપ ધારણ કરી રહ્યો છે. 'અખિલ કચ્છ ચારણ સભા'એ ગ્રામજનોના સમર્થનમાં આવવાની જાહેરાત કરી છે. આગામી દિવસોમાં આ સંસ્થા કેન્દ્ર સરકાર અને રાજ્ય સરકાર સમક્ષ ઉગ્ર રજૂઆત કરશે. જો સરકાર યોગ્ય નિર્ણય નહીં લે, તો આ આંદોલન વધુ તેજ બનવાની પૂરેપૂરી શક્યતા છે.
&nbsp;

એરસ્ટ્રીપનો કાઠડા ગામમાં વિરોધ

માંડવીના કાઠડા ગામમાં 212 એકર જમીન કપાતમાં જતા પશુપાલકો પાયમાલ થશે; ચારણ સભા મેદાનમાં.

February 5, 2026 | 11:04 IST