Ahmedabad Plane Crash : ભાવિ માતા-પિતા અને ગર્ભમાંનું બાળક પણ ન બચ્યું, પરંતુ બાળ ગોપાલ...

અમદાવાદમાં બનેલી એર ઇન્ડિયા ફ્લાઇટ AI-171 ની ભયાવહ દુર્ઘટનાએ અનેક પરિવારોનો માળો વિંખી નાખ્યો છે, પરંતુ ધોળકાના કેલિયા વાસણા ગામના જીનલ પટેલ અને વૈભવ પટેલની કહાણી કાળજુ કંપાવી દે તેવી છે. આ દંપતીના લવ મેરેજ થયા હતા અને જીનલ પટેલને સાત માસનો ગર્ભ હોવાથી તેઓ લંડનથી પોતાના વતન શ્રીમંતની વિધિ માટે ગત 30 મેના રોજ આવ્યા હતા. 5 જૂનના રોજ તેમનું શ્રીમંત ધામધૂમથી રાખવામાં આવ્યું હતું. કમનસીબે, ખુશીના આ પ્રસંગ બાદ, આ દંપતી લંડન પરત ફરી રહ્યું હતું ત્યારે જ કાળમુખા પ્લેને તેમનો ભોગ લીધો!

માત્ર 'બાળ ગોપાલ' બચ્યા, આખી દુનિયા છીનવાઈ!

આ દુર્ઘટનાની સૌથી હૃદયદ્રાવક તસવીર એ છે કે, જે બાળ ગોપાલની મૂર્તિ જીનલ પટેલના હાથમાં તેમના સીમંત દરમિયાન હતી, તે બાળ ગોપાલની મૂર્તિ જ માત્ર બચી શકી છે. જ્યારે વૈભવ પટેલ, જીનલ પટેલ અને તેમના ગર્ભમાં રહેલું સાત માસનું બાળક પણ જીવિત નથી. આ ઘટના એ દર્શાવે છે કે આ આકાશી આફત કેટલી ક્રૂર હતી, જેણે એક અણજાત જીવ અને તેના માતા-પિતાનું ભવિષ્ય છીનવી લીધું.

અમદાવાદ પર કાળમુખો પંજો અને માનવતાનું હનન...

આજે બપોરે 1.38 વાગ્યે સરદાર વલ્લભભાઈ પટેલ આંતરરાષ્ટ્રીય ઍરપોર્ટ પરથી ટેકઓફ થયેલું એર ઇન્ડિયાનું બોઇંગ પ્લેન AI-171 માત્ર બે જ મિનિટમાં, એટલે કે 1.40 વાગ્યે, અમદાવાદ શહેરના મેઘાણીનગર આઈજીપી કમ્પાઉન્ડમાં, ખાસ કરીને મેડિકલ હોસ્ટેલના બિલ્ડિંગમાં ધડાકાભેર અથડાયું હતું. આ વિમાન અમદાવાદથી લંડન જઈ રહ્યું હતું.

આ પણ વાંચો : Ahmedabad Plane Crash : બ્લેક બોક્સ મળ્યું, ટેકનિકલ ખામીની આશંકા...!

આ ભયાવહ દુર્ઘટનામાં પૂર્વ CM રૂપાણી સહિત કુલ 230 મુસાફરો હતા, જેમાં 169 ભારતીય, 53 બ્રિટિશ, 7 પોર્ટુગીઝ અને 1 કેનેડિયન નાગરિકનો સમાવેશ થાય છે. આ ઉપરાંત, વિમાનમાં 12 ક્રૂ મેમ્બર પણ હતા. પ્રાથમિક અહેવાલો મુજબ, ફ્લાઇટમાં સવાર ક્રૂ મેમ્બર અને પ્રવાસીઓ મળીને 241 ના મોત થયા છે. સૌથી કરુણ બાબત એ છે કે, જ્યાં પ્લેન ક્રેશ થયું તે મેડિકલ હોસ્ટેલના 50 ઇન્ટર્ન ડોક્ટર સહિત સ્ટાફના પણ મોત થયા છે.

આ પણ વાંચો : Ahmedabad : કિસ્મતનો ખેલ, વિજય રૂપાણીની ફ્લાઇટની તારીખ બે વાર બદલાઈ, અને અંતે...

આ કરૂણાંતિકાએ અમદાવાદ શહેર અને સમગ્ર દેશને શોકમાં ગરકાવ કરી દીધો છે. જીનલ અને વૈભવ જેવી અનેક હૃદયદ્રાવક કહાણીઓ આ વિનાશકારી ઘટનામાંથી બહાર આવી રહી છે, જે આ આકાશી આફતની ભયાનકતા અને માનવતા પર પડેલા ઘાને દર્શાવે છે.

આ પણ વાંચો : Ahmedabad માં ભયાવહ વિમાન દુર્ઘટના, Maharashtra NCP નેતાના ભાભીનું પણ થયું મૃત્યુ...